![Аргентина құрамасы Америка кубогінің финалына шықты](https://1bol.kz/cache/imagine/1200/uploads/news/2024/07/10/668e101c8ccc0740436659.jpg)
Финалда олар Уругвай – Колумбия жұбының жеңімпазымен ойнайды
Футболдан Америка кубогінің алғашқы финалисі анықталды. Канаданы 2:0 есебімен жеңген аргентиналықтар енді құрлық чемпионы атағын қорғайтын болады.
Матч Аргентина құрамасының толықтай басымдығымен өтті. Ойынның 23-минутында Родриго Де Паульдің пасын ұтымды пайдаланған Хулиан Альварес есеп ашса, 51-минутта даңқты Лионель Месси таблодағы көрсеткішті 2:0-ге жеткізді. Ол Энцо Фернандес берген пасты қақпаға дәл бағыттаған.
Мұнан кейін қос құрама да есепті өзгерте алған жоқ. Енді Аргентина финалда Уругвай – Колумбия жұбының жеңімпазымен ойнайды.
Еске салайық, соңғы Америка кубогінде Месси бастаған аргентиналықтар чемпион болған еді. Ол кезде финалда олар Бразилия құрамасымен кездесіп, 1:0 есебімен басым түскен еді. Жалғыз голдың авторы – Анхель Ди Мария.