Жаңа шығарылым! Қонақта Жасын Канбаев!

«Месси бес айлық Ямальды шомылдырып жатыр». Әлемді шулатқан суреттің тарихы қандай?

10.07.2024, 11:30

Суретті 2007 жылдың желтоқсанында фотограф Жоан Монтфорт түсірген

«Месси бес айлық Ямальды шомылдырып жатыр». Әлемді шулатқан суреттің тарихы қандай?
Диарио СПОРТ

Ламин Ямальдың әкесі жақында әлеуметтік желілерге Ламиннің бес айға толмаған кезінде Лионель Месси шомылдырып жатқан фотосын жариялады. Өзгелер мұны кездейсоқтық дер немесе фейк екенін айтар. Осылайша 2007 жылы түсірілген суреттегі екі тұлғаның футбол тарихынан ойып орын алатынын кім білген?!

Бұл суретті 2007 жылдың желтоқсанында фотограф Жоан Монтфорт түсірген. Ол The Athletic-ке берген сұхбатында былай деген: «Бұл фотосуретті жасау өте қиын болды. Оның сәтті шығуы үшін көп еңбек ету керек болды».

Бұл «Барселона» және Diario Sport қайырымдылық жобасына арналған фотосессия болды: фотосурет 2008 жылға арналған күнтізбеде жарияланды, ал одан түскен қаражат Каталонияның қайырымдылық ұйымдары мен ЮНИСЕФ-ке жіберілді.

Ол кезде «Барселона» өкілдері нәрестелермен суретке түсетін – күнтізбедегі әр ай үшін 12 ойыншы таңдалды. Мессиге Ямаль деген сәби түсті.

Монтфорт былай деп есіне алды: «Месси қазір де ұялшақ, бірақ сол кезде тіпті де ұялшақ еді. Ол пластик ваннадағы сәби мен оның анасымен бірге болды. Бастапқыда ешқандай әрекет болмады, бірақ кейін бәрі біртіндеп іске аса бастады». Анасының болуы Ламиннің өзін сенімді сезінуіне көмектесті.

 

 

Бұл суреттің кем дегенде үш нұсқасы бар: екеуінде Месси Ямальмен бірге, ал үшіншісінде оны қолында ұстап тұр.

«Бұл өте керемет оқиға. Ол кезде бұл баланың кім болатынын ешкім де елестете алмаған еді. Тіпті Мессидің де кім болатынын ешкім болжай алмаған еді», – дейді Монтфорт. 

Ол фотосессияға қатысқан әр отбасыға фотосуреттерді сыйлауға тырысатын. Әсіресе Ямальдың отбасына.

«Ойыншы үшін бұл аса маңызды емес шығар, ал ата-аналар өте қуанышты болды. Олар Барселонадан 40 шақырым жерде тұратын – кішкентай баламен соншалықты алысқа баруға әркім келісе бермейтін еді», – дейді ол сол уақыттағы оқиғаны еске алып.

Ямаль дүниеге келген кезде Месси – Испания чемпионы және Чемпиондар Лигасының жеңімпазы атанған еді.

Ямаль 2007 жылдың 13 шілдесінде дүниеге келген. Желтоқсанда бес айлық болды. Сол кезде Месси ересектер құрамында «Барса» үшін төртінші маусымын өткізіп жатқан еді. Осы уақытқа дейін ол екі рет Ла Лиганы, бір рет Чемпиондар Лигасын жеңіп алды.

2007 жылдың желтоқсаны – бұл «Лион», «Рейнджерс» және «Штутгартпен» Чемпиондар Лигасының топтық кезеңінен шығу уақыты, сондай-ақ Ла Лигада үш матч, голсыз өткен – «Эспаньолмен» тең ойын, «Депортивоға» жеңіс және «Валенсияны» ойсырата жеңген кезі.

«Барселона» 2008 жылды «Реалдан» жеті ұпайға артта бастап, маусымның соңында бұл айырмашылық 18 ұпайға дейін өсті. Сол кезде «Барса» Чемпиондар Лигасының жартылай финалында «Манчестер Юнайтедке» жол беріп, шешуші матчқа Мәскеуге бара алмады. Месси осы турнирлерде жеңіліп жатқанда, Ямаль өзінің бірінші туған күнін тойлауға дайындалып жатты.

Жеті жасында Ламин «Барселона» академиясына түсті. Бұл уақытта Месси Испанияның алты дүркін чемпионы болып, үш Чемпиондар Лигасын жеңіп, бір маусымда 73 гол соғып, төрт «Алтын доп» жеңіп алды.

Ямаль 12 жасқа толғанда, Marca оны Мессидің көшірмесі деп атап, академиядағы ең үздік ойыншы деп санап, “Клуб оны бірнеше жылдан кейін ұстай ала ма?” деп сұрақ қойған материал жазды. Ол кезде Месси маусым сайын 40-50 гол соғып, Испаниядағы жеңістер санын онға жеткізіп, алтыншы «Алтын добын» жеңіп алған еді.

15 жасында Хави Ямальды негізгі құраммен жаттығуға шақырды. Сол кезде Месси «Пари Сен-Жерменде» екінші маусымын бастап жатқан еді. Ол маусым аяқталғанда, Ямаль 15 жасында «Барса» құрамында дебют жасады.

Ламиннің клуб құрамындағы дебюті, Чемпиондар Лигасындағы дебюті, алғашқы голы – бәрі Месси АҚШ-қа «Интер Майамиде» ойнауға кеткен кезде болды.

Ямаль Мессиді кумирім деп атады, ал Лео Ямальдың «Ла Масиядағы» голдарына таңданды.

Ямалға Месси туралы үнемі сұрақ қойылғаны шаршатқан болуы керек. 2023 жылдың желтоқсанында ол былай деді:

«Месси – менің кумирім. Ол әрқашан да сондай болған және қазір «Барселонада» ойнап жүргенде де солай болып қала береді. Ол мені шабыттандырды. Менің басқа кумирім болған емес». «Лео Мессидей басқа футболшы болмайды», – деп ол көктемде атап өткен болатын.

Одан кейін 2024 жылдың жазында пікір білдірді.

«Ол тарихтағы ең үздік ойыншы, мені онымен салыстырып жатқандары, әрине, керемет. Бірақ ойынды жаңа бастап жатқанда сәл ыңғайсыз екені рас. Мен оның мансабында жеткендерінің жартысына болса да қол жеткізгім келеді», – деді ол.

«Барселона» академиясының экс-директоры Аурели Альтимира жас футболшы туралы былай дейді:

«Ол Лео емес, бірақ оған ең жақын адам. Егер ол 10 рет қақпаға соққы жасаса, 9 доп бағаналардың арасынан өтеді. Ол айып алаңында салқынқанды әрекет етеді. Ол 18 және 19 жастағы футболшылар жасамайтын нәрсені жасайды. Оның туа біткен таланты бар», – дейді ол.

Месси Ямальды «Алтын допқа» таласатын ойыншылардың бірі ретінде көреді:

«Ламин Ямаль өте жас, бірақ «Барселонада» өте жақсы ойнап, маңызды ойыншыға айналды. Адамдар Ламинді бірнеше ай бұрын ғана тани бастады, бірақ мен оны «Ла Масияда» «Реалға» қарсы ойнап, үш гол соққан кезінен, алты жылдан бері білемін. Мені оның гол соғу тәсілі қатты таңқалдырды», – дейді ол.

×
Жаңалықтар Футбол Хоккей Бокс MMA Теннис Баскетбол Ұлттық спорт Матч-болжам