Черчесовке қазақша сұрақ қойған журналист ресейлік бапкерге ұнамай қалды

Ресейдің «Спартак» клубын ұзақ жылдар жаттықтырған бапкер Олег Романцев отандасы Станислав Черчесовті жақтап шықты.

Ол «Спорт экспресс басылымына» берген сұхбатында Қазақстан құрамасының қазіргі бас бапкеріне қазақ тілінде сұрақ қойған тілшіні «провокатор» деп айыптады.

«Бұл таза арандату. Менде мұндай жағдайлар сирек болған. Қазіргі кезде баспасөз конференцияларында осындай ситуациялар қалыпты жағдайға айналған. Осындай «мерзский типтер» сәтсіз матчтан кейін бапкерді арандату оңай екенін жақсы түсініп алған. Мұндай ақымақтыққа қалай әрекет ету керек? Ең оңай жолы арандатуға ермей, салқынқанды болу. Бірақ біздің кәсібіміз қоғамдық қарым-қатынасты қажет етеді. Стас арты не болатынын білді. Сондықтан ол өзін ұятқа қалдырмақ болған ақылды жігітке қалжыңдап жауап берді. Иә, әзірге жаңа жұмысындағы көрсеткіші жақсы емес. Бірақ мұндай әдіспен Черчесовті сындыра алмайды. Соған қарамастан ҚФФ бас хатшысы Андрей Дудин жоғары санаттағы бапкер деп баға берді. Сонымен қатар, ойыншылармен тіл табысуда, жаттығуларды өткізуде және матчтарды талдауда жоғары кәсібилігін атап өтті. Бұл баспасөз мәжілісінен кейін федерация Станиславты қолдады. Қазақ тілінде үйренетінін айтты. Демек, ол жақсы адамдармен жұмыс істеп жүр. Қазір Черчесов Қазақстанға Ресеймен екі жолдастық кездесу өткізейік деп ұсынысты бекерден-бекер айтқан жоқ», - дейді Олег Романцев.

Айта кетейік, Ұлттар лигасы аясында Словениямен өткен мачтан кейінгі баспасөз конференциясында марқұм Амангелді Сейітханның ұлы Бегасыл Сейітхан Станислав Черчесовке қазақ тілінде сұрақ қойып бастайды. Бас бапкер журналистің үстіне Францияның ПСЖ клубының жейдесін киіп алғанын әзілге айналдырғысы келді ме, әйтеуір «Сен қай тілде сөйлеп тұрсың, французша ма?» деп сөзін бөлді. Сонан соң басын изеп, сұрағын жалғастыруға болатынын аңғартты.

Бұған дейін Станислав Черчесов Қазақстан құрамасына бас бапкер болып тағайындалғанда журналист Нұрсұлтан Құрманмен де тіл тұрғысында сөзге келіп қалған еді. Қазақша сұрақ қойған журналистке ресейлік маман ескерту жасап: «сен қазақша сұрасаң, мен осетинше жауап берейін» деп ұрысқаны есте. Артынша қоғам шулаған соң кешірім сұрап, қазақ тілін үйренуге уәде берді.
Черчесовтың ұлттық құрамамен жүргізіп жатқан жұмысының нәтижесі де мәз емес. Ол ресми төрт матч өткізіп, үшеуінде жеңілді, бірде-бір гол соққан жоқ.