Ол енді алтын түстес жазуы бар кимономен күреседі
Париж Паралимпиадасының чемпионы Ақмарал Науатбекке ерекше спорттық мәртебе берілді.
Отандық спортшы енді алдағы төрт жылда есімі алтын түстес жазумен жазылған кимономен күреседі. Бұл туралы ол әлеуметтік желідегі парақшасында мәлімдеп, жаңа кимононың фотосуретін жариялады.
Ақмарал Науатбек былтыр Париждегі Паралимпиадада 48 келіде чемпион атанған. Финалдағы шешуші белдесуде ол жергілікті француз парадзюдошысын қапы қалдырған еді.
Спортшы бұған дейін парадзюдодан әлем және Азия ойындарында топ жарғаны белгілі. Париждегі турнирден кейін ол Үкімет басшысының қабылдауында болып, өзге спортшылармен бірге мемлекеттік марапатқа ие болды.
Сондай-ақ, ол 2024 жылдың соңында мемлекет басшысының Францияға ресми сапары аясында Қазақстан делегациясының құрамына енді.
