Аталған ақпаратты ең алғаш болып Sona.kz telegram-каналы жариялаған болатын
Бұған дейін Алматы облыстық Дене шынықтыру және спорт басқармасының басшысы Айбол Құлбаевтың ұсталғаны туралы ақпарат жарияланған болатын. Сыбайлас жемқорлыққа қарсы қызмет бұл ақпаратты жоққа шығарды деп жазады ҚазТАГ.
«Оны ұстаған жоқ», - деп қысқа қайырған Антикор өкілдері.
Айта кетейік, басқарма басшысының ұсталғаны туралы мәліметті Sona.kz telegram-каналы жариялаған болатын. Дереккөздің жазуынша, Сыбайлас жемқорлыққа қарсы қызмет Құлбаевтың бұрын қызмет атқарған колледж-интернатын тексеру барысында кем-кетік тауып, артынша экс-басшыны ұстаған көрінеді.
Біздің редакцияға хабарласқан Құлбаевтың көмекшісі де бұл ақпараттың жалған екенін растады.
Еске салайық, Айбол Құлбаев Алматы облысы Дене шынықтыру және спорт басқармасы басшысы қызметін биыл ақпан айынан бері атқарып келеді.
