Бразилия құрамасынан тыс қалған Неймар ренішін айтты
Ол кеңейтілген тізімге енбеген.
Бразилиялық шабуылшы Неймар футболдан 2026 жылғы әлем чемпионатына дайындық аясында өтетін жолдастық матчтарда ұлттық құрама сапына шақырылмағанынан кейін көңілі қалғанын мәлімдеді. Бұл туралы Footmercato басылымы жазды.
«Әрине, мені құрамға шақырмағанына көңілім қалды. Бұған қатты қапаландым. Бірақ мен күн сайын, жаттығудан жаттығуға, ойыннан ойынға дейін бар назарымды жұмысқа аударып келемін. Мен өз мақсатымның жолында аянған емеспін. Құраманың соңғы тізімі алда белгілі болады деп ойлаймын», - деді Неймар.
Бұған дейін Бразилия футбол федерациясы алдағы жолдастық кездесулерге шақырылған 26 ойыншының кеңейтілген тізімін жариялаған болатын. Алайда бұл тізімге Неймар енген жоқ. Алайда құрамаға ресейлік «Зенит» клубының ойыншылары Дуглас Сантос пен Луис Энрике еніп отыр.
34 жастағы Неймар 2025 жылдың қаңтар айынан бері бразилиялық «Сантос» клубында өнер көрсетіп келеді. Ол қараша айында алған тізе жарақатына байланысты Бразилия чемпионатының маусымын толық аяқтай алмайды.
Сондай-ақ жарақат пен ота салдарынан белгілі футболшы 2022/23 жылғы маусымды «ПСЖ» сапында да мерзімінен бұрын аяқтаған. Тізедегі жарақатына байланысты саудиялық «Әл-Хиляль» клубында да алаңға сирек шықты.
Неймар Бразилия құрамасы сапында 128 матч өткізіп, 79 гол соққан және ұлттық команданың тарихындағы үздік бомбардирдің бірі болып саналады.