Букмекерлік жарнама салдарынан «Тобыл» – «Ордабасы» кездесуі бірнеше сағатқа кешікті
Қос команда 100 млн теңгені сарапқа салды
Түркияда өтіп жатқан 1XBET Winter Cup қысқы кубогінің финалына шыққан «Тобыл» мен «Ордабасы» арасындағы кездесуге түріктер тыйым салуы салдарынан, матч бірнеше сағатқа кеш басталды деп хабарлады Meta-ratings.kz.
Түркия өкілдерінің мұндай қадамға баруына букмекерлік кеңсенің жарнамасы себеп болған. Елде оған тыйым салынған көрінеді. Сондай-ақ, жергілікті судьяларға да матчқа төрелік етуге тыйым салынған.
Соның салдарынан Астана уақытымен 20:30-ға жоспарланған ойын кешігіп басталды.
Нәтижесінде, 90 минут бойы жеңімпазды анықтай алмаған командалар матч соңынан кейінгі пенальти тебісіп, 7:6 есебімен «Ордабасы» жеңіске жетті. Тиісінше, жүлде қорындағы 100 миллион теңгенің 60 миллионын шымкенттік клуб иеленсе, 40 миллионы «Тобылға» бұйырды.