Абиба Әбужақынова жеңілісіне қатысты пікір білдіріп, эмоциясын жасыра алмады (ВИДЕО)

Дзюдодан Олимпиада ойындарында 48 келіге дейінгі салмақта өнер көрсетіп, үшінші орын үшін болған белдесуде жеңіліп қалған қазақстандық балуан Абиба Әбужақынова жарыстан кейін журналистер сұрағына жауап берді.

Еске салайық, ширек финалда жерлесіміз испан қызынан жеңілсе, жұбаныш белдесуінде Парагвай балуанын ұтқан еді. Ал, қола жүлде үшін болған кездесуде 18 жастағы швед дзюдошысынан айласын асыра алмады.

«Білмеймін... Жарақат болса да шыдайтын едім, сол қателік... Қарсыласым швециялық Тара Бабулфатпен күресу өте қолайсыз әрі тиімсіз болды. Әдіс жасатпайды, лақтыра алмайсың. Қаншама әрекет жасадым, бәрібір өзінікін істеді. Ол жарақатымның барын біліп, аяқтан теуіп тұрды. Әрі қарай күресуге тырыстым. Бірақ болмады», - дейді Абиба эмоциясын жасыра алмай.

Осылайша Абиба Әбужақынова Париж Олимпиадасын бесінші орынмен аяқтады. Ал, ерлер арасында 60 келіде сынға түскен Елдос Сметов Олимпиада чемпионы атанып отыр.