Геннадий Головкин Африкада боксты дамытуға кірісті

World Boxing ұйымының президенті Геннадий Головкин мен бас хатшы Том Дилен Дакарда өтіп жатқан 2026 жылғы жасөспірімдер Олимпиадасы аясында Намибия Ұлттық олимпиадалық комитетінің президенті Ндеулипула Хамутумва және атқарушы директоры Анри Паркермен кездесті. Бұл туралы ұйымның ресми сайты хабарлады.

Кездесуде Намибияда боксты дамыту және World Boxing ұйымымен ынтымақтастықты нығайту жолдары талқыланды.

Намибия тарапы алдағы уақытта World Boxing аясындағы халықаралық турнирлердің бірін өз елінде өткізуге қызығушылық білдірді. Сондай-ақ елдің халықаралық бокс күнтізбесіндегі рөлін арттыруға ниетті екенін жеткізді.

Өз кезегінде World Boxing бапкерлерді, техникалық мамандар мен спорт әкімшілерін даярлау мүмкіндіктерін таныстырды. Ұйым бұл бағыттағы білім беру бағдарламаларын, соның ішінде онлайн оқыту курстарын кеңейтуді жоспарлап отыр.

Тараптар 2028 жылы Лос-Анджелесте өтетін Олимпиада ойындарына Намибия боксшыларын дайындау мәселесіне де тоқталды. Атап айтқанда, 2026 жылғы Глазгода өткен Достастық ойындарының күміс жүлдегері Трайэген Ндевелоның жетістігі сөз болды. Ол Лос-Анджелес Олимпиадасына жолдама алуды мақсат етіп отыр және «Олимпиадалық ынтымақтастық» бағдарламасының стипендиясы арқылы дайындалып жатыр.

«Намибия Ұлттық олимпиадалық комитетінің спортқа деген жауапкершілігін көру қуантады. Олар бокстың қоғамға тигізер пайдасын және адам өмірін өзгерте алатын күшін жақсы түсінеді. Мұны Трайэгеннің Глазгодағы жетістігі айқын көрсетті. Ынтымақтастығымыздың арқасында ол қазір «Олимпиадалық ынтымақтастық» бағдарламасының стипендиясымен 2028 жылғы Олимпиадаға дайындалып жатыр. Біз оның нәтижелерін бақылауды жалғастырамыз», – деді World Boxing ұйымының бас хатшысы Том Дилен.

Кездесу барысында Намибия өкілдері елдің бокс федерациясы атынан Геннадий Головкинді қолдайтынын білдіріп, оның басшылығымен World Boxing ұйымының даму бағытына сенім артатынын жеткізді.

Кездесу қорытындысында тараптар халықаралық жарыстар өткізу, мамандарды оқыту және спортшыларды дамыту бағыттарындағы ынтымақтастықты жалғастыруға келісті.