«Нокаутпен аяқталады»: Хамза Шираздың бапкері Жәнібек Әлімханұлының жеңілетініне сенімді

Әлемнің WBO және IBF нұсқалары бойынша орта салмақтағы чемпионы Жәнібек Әлімханұлы мен Хамза Шираздың жекпе-жегін көпшілік асыға күтіп жүр.

Британдық боксшы WBO белбеуіне ресми үміткер болып саналады, ал Бүкіләлемдік бокс ұйымы Әлімханұлы мен Шираздың жекпе-жегін өткізуге рұқсат берді. Қос тарап 4 қарашаға дейін барлық келісім шарттарын, әсіресе жекпе-жек өтетін күн мен орнын келісуі тиіс.

Британдық боксшының бапкері Рики Фуньес Sports.kz тілшісіне сұхбат берді. Ол Хамза Шираздың қазақстандық чемпионмен қолғап түйістіруге дайын екенін және бұған дейін жекпе-жектен бас тартпағанын айтты.

– Рики, боксты сүйетін миллиондаған жанкүйерлер Шираз бен Әлімханұлы арасындағы жекпе-жектің уақытын күтіп отыр. Сізге келіссөздер барысы туралы бірдеңе белгілі ме?

– Менің міндетім — Хамзаны дайындау және оны барынша тиімді орындау. Бірақ, маған белгілі болғандай, тараптар ортақ келісімге келе алады.

– Біраз уақыт бұрын Бүкіләлемдік бокс ұйымы тараптар арасындағы келіссөздердің мерзімін 4 қарашаға дейін ұзартқан болатын. Сауда-саттыққа бару қажет бола ма деп ойлайсыз ба?

– Жоқ деп ойлаймын. Фрэнк Уорреннің Жәнібектің промоутері Боб Аруммен жақсы қарым-қатынасы бар екенін білемін, сондықтан саудаға жетпейді деп үміттенеміз. Алдағы бірнеше күнде жаңалық болады, бәлкім одан да ертерек.

– Сіз жеке өзіңіз Әлімханұлымен жекпе-жекке дайынсыз ба?

– Жеке өзім осындай жекпе-жектің ұйымдастырылғанын қатты қалаймын. Біз бұл жекпе-жекке дайынбыз, Жәнібекпен қолғап түйістіруге әзірміз. Хамза да Жәнібекті өзіне мықты қарсылас ретінде қарастырады. Орта салмақта үлкен жекпе-жек керек, ал менің ойымша, менің шәкіртім мен Жәнібек Әлімханұлы арасындағы жекпе-жек осы үшін ең үздік жекпе-жек болмақ.

– Бокс жанкүйерлері арасында Шираз Жәнібекпен жекпе-жектен қашып жүр деген әңгіме бар. Бұл қауесет шындыққа сая ма?

– Түбегейлі жалған әңгіме. Бұл — осы сыбыстарды тарататындарға айта алатын ең орынды сөзім. Шираз тек үлкен жекпе-жектерге ұмтылады, біз кез келген сынаққа дайынбыз. Егер біз Жәнібектен қашып жүрсек, Фрэнк Уоррен бұл жекпе-жекке Әлімханұлының командасына көлемді қаржы ұсынбас еді.

– Сіз Жәнібек туралы білесіз бе, оның жекпе-жектерін көрдіңіз бе?

– Мен оның жекпе-жектерінің видеосын көрдім. Ол жақсы боксшы, оның стилі маған ұнайды, ал Шираздың стилімен бірге бұл бокс жанкүйерлері үшін керемет жекпе-жек болады. Бұл тамаша шоу болады. Әрине, промоутерлер келісімге келсе, қарсыласты егжей-тегжейлі зерттейміз.

– Шираз бен Әлімханұлы жекпе-жегін шамамен қашан күтуге болады?

– Бұл жекпе-жекке ең қолайлы уақыт — ақпан айының соңы немесе наурыздың басы деп ойлаймын. Біз осы уақытқа назар аударамыз.

– Әлімханұлына қарсы арнайы стратегия бола ма?

– Біз өз күшті жақтарымызға сүйеніп, әдеттегі тәртіпте дайындалатын боламыз. Жәнібек — солақай, әрине, бұл кейбір өзгерістер енгізеді, бірақ аса маңызды емес. Біз өзімізге сенімдіміз.

– Жекпе-жекке қатысты болжамыңыз қандай?

– Жәнібек әлі Хамза сияқты панчермен (қарсыласын нокаутқа жіберетін спортшылар) кездескен жоқ. Сонымен қатар, біз үшін де Әлімханұлы — қарсыластардың ішіндегі ең мықтысы болатынын түсінеміз. Мен айта алатын жалғыз нәрсе — бұл керемет жекпе-жек болажы және сөзсіз нокаутпен аяқталады.