Сондай-ақ, бір күміс және он қола медаль қоржында
Бокстан жастар арасында өтіп жатқан әлем чемпионатында қазақстандық Өнер Сейілхан (71 кг) жарыс жеңімпазы атанды.
Финалда отандасымыз ресейлік Алексей Гудковпен кездескен болатын. Алғашқы раундта Өнер қарсыласынан бір бас жоғары өнер көрсетіп, барлық төрешінің оң бағасын алды. Ал, екінші раундта орыс боксшысы тегеурінді қарсылық танытқанымен, бәрібір таразы басын теңестіре алған жоқ, бұл раундта төрешілер 3:2 есебімен жеңісті Сейілханға берді. Ал, шешуші раундта қазақстандық спортшы тағы да айқын басымдық тіркеп, жалпы жекпе-жекте жеңіске жетті.
Осылайша, Черногорияда өтіп жатқан жастар арасындағы әлем чемпионатында Қазақстан қоржынына алтыншы алтын медаль түсті. Сондай-ақ, бір күміс және он қола медаль да еншімізде.
