Ол Лукасты нокаутпен жеңе алмаса өз гонорарын толық беруге дайын екенін айтты
Қазақстандық кәсіпқой боксшы Балауса Мұздыман өзінің байырғы қарсыласы Ангелина Лукаспен жекпе-жек өткізгісі келетінін мәлімдеді.
Еске салайық, боксшы қыздардың жолы әуесқой бокста түйісіп, жекпе-жек соңы дауға ұласқан еді. Төрешілер Балаусаның қолын көтергеннен кейін Ангелина мен оның бапкері әділетсіздік болғанын айтып, бірнеше рет шағымданған.
«Бәріңіздің асыға күтіп жүрген жекпе-жек Ангелина екеуіміздің өзара тартысымыз екені сөзсіз. Ангелина не себепті жекпе-жектен қашып жүргенін білмеймін. Бірақ, Ангелина, мен сені нокаутпен ұтатыныма сенімдімін. Егер де нокаутпен ұтпаған жағдайда өзімнің гонорарымды беруге дайынмын. 100 000 доллорды бұған дейін сен ешқандай жекпе-жекте алмағансың және де ала алмайтыныңа да сенемін», - деп жазды Балауса Мұздыман.
Балауса кәсіпқой бокста бес рет жекпе-жек өткізіп, бесеуінде де жеңіске жеткен. Ангелина болса 12 жекпе-жектің тек біреуінде жеңіліп, басқасының бәрінде жеңіске жетті. Ол өткен аптада «IBA Чемпиондар түнінде» жекпе-жек өткізді.
