Тараздық боксшы 2023 жылы Ташкенттегі әлем чемпионатында топ жарған
Бокстан әлем чемпионы Асланбек Шымбергеновке Ақтөбе облысындағы жасөспірімдер турнирі кезінде жергілікті азаматтар ат мінгізді.
Шалқар қаласында Мөңке бидің туғанына 350 жыл толуына орай 2011-2012 жылы туған жасөспірімдер арасында өткен республикалық турнирде ұлттық құраманың бұрынғы мүшесіне құрмет көрсетілген.
Салтанатты ашылу рәсімінде боксшыға сөз беріліп, кейін ұйымдастырушылар шапан жауып, ат мінгізгенін хабарлаған.
Асланбек Шымбергенов 71 келіде Париж олимпиадасына қатысқан болатын. Алғашқы айналымда Иордания боксшысына есе жіберген ол кейін құрама қатарына қосылған жоқ. Бас бапкер Қайрат Сәтжанов әлем чемпионына қатысты жоспарын айтып, алда ірі жарыстарға қатыстыруды көздемейтінін айтқан еді.
Тараздық боксшы 2023 жылы Ташкентте өткен әлем чемпионатында топ жарса, сол жылы Қытайда өткен Азия ойындарында қола жүлдегер атанды.
