Балауса Мұздыман 5 сәуірде Астанада өнер көрсетеді
5 сәуірде Астанада өтетін кәсіпқой бокс кешінде қазақстандық Балауса Мұздыман (6-0, 5 КО) рингке шығады.
Ол әу баста бұрын мүлдем жеңіліп көрмеген америкалық боксшы Розалинда Родригеспен (14-0, 3 КО) жолықпақшы болған. Бірақ соңғы сәтте қарсыласы ауысты. Себебі белгісіз. BoxRec.com енді Мұздыманның қарсыласы ретінде филиппиндік Мария Тереза Пинилиді (7-1, 2 КО) көрсетіп тұр. Жеңіл салмақтағы жекпе-жек сегіз раундқа жоспарланған.
Еске салайық, 5 сәуірде өтетін бокс кештің басты жекпе-жегі WBO және IBF тұжырымдары бойынша орта салмақтағы әлем чемпионы атағы үшін Жәнібек Әлімханұлы (16-0, 11 КО) мен француз Анауэль Нгамиссенгуэ (14-0, 9 КО) арасындағы жекпе-жек болмақ.
Балауса соңғы рет 2024 жылдың желтоқсан айында жекпе-жек өткізген болатын. Ол кезде отандасымыз үндістандық Сушила Виратты (6-2, 4 КО) нокаутпен жеңген еді.
