«Миллион проблемамыз бар». Григорий Бабаян «Астана» клубындағы қиындықтарды айтты

Қазақстан Премьер-лигасының екінші турындағы «Қайсармен» өткен матчтан кейін «Астананың» бас бапкері Григорий Бабаян ойын туралы пікір білдіріп, алаң сапасы, клубтағы қазіргі жағдай, инвесторлар мәселесі және команда құрамына қатысты сұрақтарға жауап берді.

– Матч туралы не айтасыз?

– Өте жақсы матч болды. Әсіресе стадиондағы атмосфераны ерекше атап өткім келеді – керемет болды. Жанкүйерлерге үлкен рақмет. Стадионның өзі де өте жақсы.

Бірақ бір нәрсе маған түсініксіз. Осындай жаңа стадионда неге алаң суарылмайды? Егер алаң суарылса, жанкүйерлер одан да тартымды футбол көрер еді. Доп жылдамырақ жүрер еді.

Құрғақ алаң – жарақат алу қаупін арттырады. Мұндай жерде кез келген тайғанақтау немесе сырғанау ойыншылардың денесінде бірден жара қалдырады. Немен байланысты екенін білмеймін, бірақ өкінішке қарай, осылай болып тұр.

Бұл тек біздің команда үшін емес, сіздердің команда үшін де, жалпы футболдың көрермен деңгейі үшін де мәселе. Біз бұл туралы делегатқа да айттық.

– Ойынның өзіне келсек…

– Менің ойымша, біз жеңіске жақынырақ болдық. Бізде бірнеше жақсы мүмкіндіктер болды: бұрыштамалардан кейін қауіпті сәттер туындады, қайтарылған доптарға үлгермей қалған кездер болды.

Әрине, қарсыластың да мүмкіндіктері болды. Бірінші және екінші таймда қарсы шабуылдан екі қауіпті сәт шығарды.

Жалпы алғанда, біздің дайындық жағдайымызды және командадағы мәселелерді ескерсек, тең нәтиже – әділ нәтиже деп ойлаймын.

Жігіттерге ешқандай ренішім жоқ. Олар бар күшін салды. Біз қазір киім ауыстыратын бөлмедегі бірлікке, жақсы атмосфераға және команданың мінезіне сүйеніп ойнап жүрміз. Себебі жағдайымыз оңай емес. Көп адам бізді әлдеқашан есептен шығарып қойған. Бірақ біз әр матчта алаңға шығып, ұпай алуға тырысамыз.

– Маусым басталмай тұрып «Астана» құрамына қатысты көп әңгіме болды. Команда толық жасақталды ма?

– Бізден көптеген футболшылар кетті. Бірі Ресейде ойнап жүр, бірі Болгарияда, енді бірі Қытайға кетті. Бұл – біз үлкен еңбекпен жинаған сапалы ойыншылар еді.

Қазір біз қолымыздағы ойыншыларға сенеміз. Өйткені қазіргі жағдайды ескерсек, жазға дейін жаңа ойыншыларды тіркей алмайтын сияқтымыз.

Инвесторлар мен демеушілер мәселесі қалай шешілетінін мен нақты айта алмаймын – бұл клуб басшылығының құзырындағы мәселе. Бірақ біз әзірге жаңа ойыншы ала алмай отырғанымыз – шындық.

Қазіргі құрамда өткен жылдан қалған шамамен 12-13 футболшы бар. Оларға жастар қосылды. Бұл жас ойыншылар үшін үлкен мүмкіндік.

«Астана» тарихында клуб трансфер нарығында ойыншы ала алмайтын жағдай болмаған. Сондықтан біздің жас тәрбиеленушілер үшін бұл – өзін көрсетуге үлкен мүмкіндік.

Олардың жұмысын нашар деп айта алмаймын. Әрине, кейде тәжірибе мен шеберлік жетіспей жатады. Бірақ бұл – біздің қазіргі шындығымыз. Біз осы кезеңнен өтуіміз керек.

Қиындықтарға қарамастан, команда жұмыс істеп жатыр. Жігіттердің мінезі бар, тәртібі бар, ұйымшылдығы бар. Ал проблемаларымыз… шынын айтсам, миллион.

– Қазір клуб тарихындағы ең қиын кезең деп айтуға бола ма?

– Менің есімде қалған уақыттың ішінде бұл, бәлкім, ең қиын кезең шығар.

Бірақ кез келген қара жолақтан кейін жақсы кезең келетініне сенеміз. Бір күні «Астана» бұрынғы даңқын қайтарады деп үміттенеміз.

– Бұл маусымда клубтың нақты міндеті қандай?

– Бізде нақты мақсат қойылған жоқ. Біз матчтан матчқа қарай жүреміз. Әр келесі ойын біз үшін маңызды.

– Жаңа инвестициялар мен жаңа ойыншылар чемпионат деңгейін көтере ме?

– Басқа клубтарда жағдай қалай екенін нақты білмеймін. Бірақ бір нәрсе анық: ақшаны дұрыс пайдалану керек.

Дұрыс футболшыларды таңдап, дұрыс команда құру керек. Сонымен қатар Ресейдегі «Анжи» клубындағы жағдай қайталанбауы тиіс. Олар екі жыл үлкен қаржы жұмсады, кейін бәрінен бас тартты.

Сондықтан мұнда жүйелі жұмыс керек. Инвесторлар ұзақ мерзімге келіп, футболды дамытуы керек.

Қазір біз «Ақтөбе», «Ордабасы», сондай-ақ Турлов басқаратын Қарағанды клубында белгілі бір жүйе бар екенін көріп отырмыз.

Ал егер біреу бір-екі жылға келіп, кейін кетіп қалса – бұл үлкен проблема. Өйткені мемлекеттік қаржыландыру тоқтатылды, бәрі жеке инвесторлардың қолына өтуде.

Ертең олар «біз дайын емеспіз» немесе «біз бұдан бас тартамыз» десе, клуб бірден бірнеше қадам артқа кетуі мүмкін. Сондықтан инвесторлар инфрақұрылымды дамытып, болашаққа бір нәрсе қалдыруы өте маңызды.

– Астанада да, Қызылордада да жасанды алаң. Алаң сапасын қалай бағалайсыз?

– Сіздерде өте жақсы алаң бар, бірақ оған су жетіспейді. Осындай күйде бұл алаң – үлкен проблема.

Көріп отырсыздар, доп үнемі тежеліп қалады. Соның салдарынан ойынның жылдамдығы төмендейді. Допты қабылдауға көп уақыт кетеді. Жылдам футбол ойнау қиын.

Егер алаңды суарып отырса – ойын мүлде басқаша болар еді. Жанкүйерлер де басқа деңгейдегі футбол көрер еді.

– «Самұрық-Қазына» қаржыландырудан бас тартты деген ақпарат бар. Қазіргі жағдай қандай?

– Жоқ, «Самұрық-Қазына» бізді белгілі бір көлемде әлі де қаржыландырып отыр. Бірақ қаржы мәселесіне қатысты толық ақпаратты клуб басшылығы бере алады.

Ал біз жаңа ойыншы ала алмай отырғанымыз – шындық.

– «Қайсар» командасы туралы не айтасыз?

– Егер сіздердің «Жеңіспен» ойнаған матчтарыңызды қарасақ, схемалар бірдей болды. «Жеңіс» 3-4-3 жүйесінде ойнап, қорғаныста 5-4-1-ге ауысты – сіздер де солай ойнадыңыздар.

Ол жерде әр ойыншы өз қарсыласымен ойнады, күрес көп болды, ұзын пастар қолданылды.

Ал біз комбинациялық футбол ойнауға тырысамыз. Сондықтан бізге сапалы алаң өте маңызды.

Жалпы «Қайсар» – теңгерімді команда. Олар ойынның барлық фазасында ойнауға тырысады. Оның үстіне сіздер Мозес сияқты ойыншыны алдыңыздар.

Ол – айырмашылық жасай алатын футболшы. Алаңға шыққанда оның деңгейі бірден көрінеді. Әрине, оған әлі уақыт керек. Бірақ мұндай ойыншыны шақыру – клуб басшылығының жақсы жұмысы.

– Қызылордадағы атмосфера туралы не айтасыз?

– Бұл жерде ойнау әрдайым қиын. Әсіресе жанкүйерлердің қолдауы өте күшті. Атмосфера жағынан бұл матчты еуропалық деңгейдегі ойын деп айтуға болады.

Біз Астанада Конференциялар лигасы, Еуропа лигасы және Чемпиондар лигасы матчтарында осындай қолдауды көргенбіз.

Жанкүйерлердің толқыны, стадиондағы шу, эмоциялар – бәрі керемет болды.

Қызылорданың жанкүйерлері осындай атмосфераға лайық.