Қазақстандықтар «Челсиге» емес, «Астанаға» жанкүйер болуы керек – Григорий Бабаян

«Астана» клубының бас бапкері Григорий Бабаян футболдан жылдың ең жоғары сұранысқа ие болған матчында елордалық ұжымға қолдау көрсетуге шақырды.

Алматыда Португалияның «Витория Гимарайнш» клубымен 1:1 есебімен тең түскен ойыннан соң Бабаян командаға «Астана Арена» стадионындағы көңіл күйдің жетпей жатқанын алға тартты.

«Бізге өз стадионымыздағы атмосфера жетпей қалды. Кеше менен «Астана Арена» жайлы сұрады. Егер кездесу өз алаңымызда, өз жанкүйерлеріміздің алдында өткенде, қарсылас дәл бұлай еркінсімейтін еді. Меніңше, біз бұл ойында жеңіске де жетуші едік. Себебі біздің аренадағы атмосфера бөлек.
Кез келген қарсыласқа лық толы «Астана Аренада» ойнау өте қиын. дегенмен мұндай қиын қарсыласпен ұпай бөліскеніміз де жаман көрсеткіш емес шығар. Себебі олар бұған дейінгі барлық матчта жеңіске жетіп келді. Бүгін ғана ұпай жоғалтып отыр», - деді ол.

Бас бапкер енді «Челсиге» қарсы матчқа дайындалатынын тілге тиек етті.

«Келесі қарсылас «Челсимен» матчқа дайындаламыз. Мұны барлық жанкүйер күтіп отыр, «Челси» секілді ұжымның елімізге келуі айтулы оқиға. Бізді алда екі ойын күтіп тұр: «Челси» және АПОЭЛ. «Челсиге» қарсы ойын оңай соқпайтыны анық. Конференция лигасындағы үздік команда. Қолымыздан келгеннің бәрін жасаймыз», - деп қосты ол.

Тілшілер Бабаяннан жанкүйерлердің басым бөлігі «Челсиге» жанкүйер болады деп қорықпайсыз ба?» деп те сұраған.

«Мұнда «Челсиді» қолдайтын фан-клубтар өте көп. Бірақ олар нағыз патриот деген сенімдемін. «Челси» бұл Англия ғой, ал «Астана» - Қазақстан. Олар өз командасына жанкүйер болады деп ойлаймын. Әрине, «Челси» ойыншыларын өз көзіңмен көрген жақсы, бірақ сен патриот болсаң, онда ең алдымен өз еліңе жанкүйер болуың керек», - деді ол.

Айта кетейік, «Астана» - «Челси» матчы 12 желтоқсанда өтеді.