Өзбек футболшысы – қорғаушы, Дастан Сәтпаев – шабуылшы
Футболдан Қазақстан ұлттық құрамасы бас бапкерінің міндетін атқарушы Әли Әлиев баспасөз мәжілісінде жақында «Қайрат» клубының 16 жастағы түлегі Дастан Сәтпаев туралы айтты.
Ресми емес ақпаратқа сенсек, Дастанды лондондық «Челси» өз қатарына қосады. Тек оның 18 жасқа толғанын күтіп отыр.
«Меніңше, Дастан өзбекстандық Абдукодир Хусановтан мықтырақ. Егер футболға деген қарым-қатынасы дұрыс болса, оның болашағы алда. Дастанның генетикасы қандай екенін көрсеңіздер болады. Ол нағыз атлет. Еуропалық стандарт бойынша даму мүмкіндігі берілсе, қолынан бәрі келеді. Бүгінгі таңда «Реал Мадридте» Арда Гюлер мен бразилиялық Эндрик бар. Дастан қазақстандық болған соң, көп ешкім назар аудар қойған жоқ. Дегенмен, Сатпаев халықаралық аренада өзін дәлелдеуге мүмкіндігі жеткілікті», - дейді Әли Әлиев.
Айта кетейік, өзбекстандық қорғаушы Абудкодир Хусанов жақында 50 млн еуроға Англияның «Манчестер Сити» клубына ауысты. Ал, инсайдер Фабрицио Романоның жазуынша, Дастан Сәтпаев «Челсимен» келісімге келген. Трансфер құны – 4,5 миллион еуро. Бірақ ол кәмелеттік жасқа толғанша Алматының «Қайратында» ойнай тұрады.
