«Алтын доп – 2025»: Әлемнің үздік футболшысы кім?

Париждің әйгілі Шатле театрында әлем футболының ең беделді марапаттарының бірі – «Алтын доптың» 69-шы салтанатты рәсімі өтті. France Football журналының нұсқасы бойынша 2024/25 маусымның үздік ойыншылары мен клубтары анықталды.

Әйелдер футболындағы тарихи жетістік

Әйелдер арасында басты жүлдені «Барселона» мен Испания құрамасының жартылай қорғаушысы Айтана Бонмати еншіледі. Бұл – оның қатарынан үшінші «Алтын добы». Осы жетістігі арқылы Бонмати әйелдер футболының тарихында ең көп мәрте «Алтын доп» иеленген ойыншы атанды. Бұған дейінгі рекорд оның командаласы Алексия Путелласқа тиесілі болатын.

Ерлер арасындағы басты марапат

Ерлер футболындағы «Алтын допты» «Пари Сен-Жерменнің» шабуылшысы Усман Дембеле алды. Сыйлықты оған аңыз ойыншы Роналдиньо табыс етті. Өткен маусымда Дембеле Луис Энрикенің жетекшілігімен үздік ойын өрнегін көрсетіп, ПСЖ-ның Лига чемпиондарын жеңіп алуына тікелей үлес қосты.

Маусым үздіктері

Рәсім барысында бірнеше номинациялар бойынша да жеңімпаздар анықталды:

• Үздік ерлер клубы – «Пари Сен-Жермен» (Франция)

• Үздік әйелдер клубы – «Арсенал» (Англия)

• Үздік сұрмерген (ерлер) – Виктор Дьёкереш («Спортинг»/«Арсенал», Швеция)

• Үздік сұрмерген (әйелдер) – Эва Пайор («Барселона», Польша)

• Үздік қақпашы (ерлер) – Джанлуиджи Доннарумма («ПСЖ»/«Манчестер Сити», Италия)

• Үздік қақпашы (әйелдер) – Ханна Хэмптон («Челси», Англия)

• Үздік бапкер (ерлер) – Луис Энрике («ПСЖ»)

• Үздік бапкер (әйелдер) – Сарина Вигман (Англия құрамасы)

• 21 жасқа дейінгі үздік ер футболшысы – Ламин Ямаль («Барселона», Испания)

• 21 жасқа дейінгі үздік әйел футболшысы – Вики Лопес («Барселона», Испания)

Жас жұлдыздар феномені

18 жастағы Ламин Ямал өзінің керемет маусымымен әлем назарын аударды: ол 21 гол соғып, 22 нәтижелі пас берді. Оның ойыны «Барселонаға» Ла Лига, Испания кубогы және Суперкубокта жеңіс сыйлады. Журналистер атап өткендей, Месси мен Роналду дәуірінен кейінгі жаңа заманның басты бәсекесі дәл осы Ямал мен Дембеле арасында өрбуі мүмкін.

«Алтын допқа» үміткерлердің қатарында мадридтік «Реалдың» көшбасшылары Килиан Мбаппе мен Винисиус Жуниор да болды. Айта кетейік, дәл осы «Реал» жуырда Алматыда «Қайратқа» қарсы Чемпиондар лигасының матчына шығады. Бұл кездесу Қазақстан футбол жанкүйерлері үшін маусымның ең айтулы оқиғаларының бірі болмақ.