Бұның алдында да біздің құрама тас-талқаны шығып жеңілген
Хоккейден Оттавада (Канада) өтіп жатқан жастар арасындағы әлем чемпионатында Қазақстан құрамасы Чехиядан 2:14 есебімен ойсырай жеңілді.
Чехтар сапынан Матей Машталирижски, Войтех Градец және Якуб Штанцль хет-трик авторы атанса, Петр Сикора, Якуб Дворжак, Адам Ехо, Адам Новотны және Войцех Чихар бір-бір шайбадан соқты.
Ал, Қазақстан құрамасынан Кирилл Ляпунов пен Александр Ким қанжығасын майлады.
Айта кету керек, Чехия хоккейшілері алты секундта екі шайба соғып, әлем чемпионатындағы рекордты қайталады. Ал, Қазақстан құрамасы болса өз қақпасына ең көп шайба жіберген командалардың бірі атанып отыр.
Еске салайық, Сергей Старыгин шәкірттері бұған дейін Швециядан 1:8 есебімен жеңілген болатын. Енді 30 желтоқсанда Словакияға қарсы матч өткізеді.
