Келесі ойын Таиланд құрамасына қарсы өтеді
Харбиндегі (Қытай) қысқы Азия ойындарында хоккей матчтары басталып кетті. Қазақстанның қыздар құрамасы бірінші ойында Гонконгпен кездесіп, 12:0 есебімен жеңіске жетті.
Бірінші кезеңде қазақстандықтар төрт шайба соқты. Дильназ Саяхатқызы дубль жасаса, Мунира Саяхатқызы мен Лариса Свиридова бір-бір голдың авторы атанды.
Екінші кезең де қазақстандық хоккейші қыздардың бақылауымен өтті. Бұл кезеңде Александр Тебеньков шәкірттері жауапсыз бес шайба соқты. Гол авторлары: Мадина Тұрсынова, Анастасия Оразбаева, София Зубкова және Мунира мен Дильназ Саятқызы.
Қалған үш шайба Гонконг қақпасына үшінші кезеңде кірді. Алдымен Дария Молдабай көзге түссе, артынша Екатерина Куценко мен Мунира Саяхатқызы ойын нүктесін қойды.
Келесі матчты Қазақстан қыздары 4 ақпанда Таиланд құрамасына қарсы өткізеді. Таи хоккейшілері бірінші матчта Тайваньнан 1:4 есебімен жеңілген.
