Жекпе-жек Астана уақытымен 8 желтоқсан күні таңда Лас-Вегаста өтеді
Қазақ файтері Шавкат Рахмонов пен ирландиялық Иэн Гэрри арасындағы жекпе-жекке санаулы күндер қалды. Қос спортшы да қазір дайындығын пысықтап, журналистер алдына шығып та үлгерді.
Ал, «Бірінші бол» студиясында қонақта болған MMA-дан әлем чемпионы Ерназ Мұсабек пен спорт сарапшысы Исатай Мәди осынау жекпе-жекке қатысты өз болжамын айтып, Қазақстандағы аралас жекпе-жектің бүгінгі даму барысын талқылады.
Ерназ Мұсабек Шавкатпен бір залда жаттығу жасап, тіпті бірге күрескен. Ол NOMAD-тың өте төзімді, тоқтаусыз екі сағат бойы күресе беретініне куә болғанын айтады. Ал, Исатай Мәди болса Иэн Гэрридің батылдығын жоғары бағалау керек дейді. Өйткені, ирландиялық файтерге әлсіздеу қарсыласпен жекпе-жек өткізуге ұсыныс болған. Десе де, ол тәуекелге барып, UFC-дің ең үздіктерінің бірі – Шавкатты таңдапты.
Қос спикер де жекпе-жектің соңына жетпей Шавкаттың жеңісімен аяқталатынын болжады. Аяқта тұрып төбелесуге де, партерде күресуге де жақсы машықтанған отандасымыз Гэрриді үшінші раундтан кейін қылқындырып жеңеді дейді олар.
