Ол көктемде чемпиондық титул үшін төбелесуі керек еді
Қазақстандық аралас жекпе-жек шебері Шавкат Рахмоновтың (19-0) келесі жекпе-жегін қашан өткізетіні белгілі болды. Dar Team командасының бапкері Эдуард Базров «Вестник MMA» YouTube-каналына сұхбат беріп, алдағы жоспарларымен бөлісті.
Еске салайық, Шавкат Рахмонов биыл көктемде чемпиондық титул үшін америкалық Белал Мухаммадпен (24-3) жекпе-жек өткізуі керек болған. Алайда, оның денсаулығы сыр беруіне байланысты UFC Белалға өзге қарсылас тауып берді.
«Бұл жарақат Гэрримен жекпе-жектің кезінде де болған. Біз оны тездетіп жазылады деп ойлаған едік, алайда процесс созылып кетті. Қазір оған әлі де емделу керек. Иә, біз көктемге дейін аяғын емдеп үлгерер ме деп едік, бірақ алда Рамазан айы келе жатыр, ол дәрілерін уақытылы қабылдай алмайды.
Біз асықпай, Шавкаттың толықтай қалпына келгенін күтеміз. Сосын ғана титулдың соңынан қууды жалғастырамыз. Болжам бойынша ол биыл жаздың соңына қарай октагонға оралады», - деді Базров.
Айта кетейік, алғашқы орта салмақта әлем чемпионы Белал Мухаммад мамыр айында аустралиялық Джек Делла Маддаленамен төбелесетін болды.
