Әкесінің ізін қуған Инем Исхаков бала кезінен регбимен айналысқан
Бойында қазақтың қаны бар 21 жастағы француз регбишісі Инем Исхаков ұлттық құрама сапына қосылды.
«Дядя Ваня» telegram-арнасының мәліметінше, Инем Исхаковтың әкесі – үлкен Инем Исхаков Қазақстанда дүниеге келген. 1980 жылдары ол Алматының СКА регби клубының көшбасшыларының бірі болып, КСРО чемпионатының бірнеше дүркін жүлдегері және Кеңес Одағы кубогының иегері атанды.
1990 жылы Исхаковтардың үлкені Қазақстаннан Францияға шақырылған алғашқы регбишілердің бірі атанды. Ол француз клубына жоғары дивизионға көтерілуге көмектесіп, мансабын сол жақта жалғастырды. Ал спорттық жолын аяқтаған соң Францияда қалып, регби саласында кеңесші ретінде жұмысын жалғастырды.
Әкесінің ізін қуған Инем Исхаков бала кезінен регбимен айналысқан. Ол алты жасында алғашқы жаттығуын өткізді, сондай-ақ дзюдо мен жеңіл атлетиканы қатар алып жүрді, кейін толықтай кәсіби спортқа бет бұрды.
Қазіргі таңда Исхаков үшінші шептің ойыншысы (фланкер) ретінде өнер көрсетеді. Ол Франция құрамасы сапында бірнеше матч өткізіп үлгерген. Алайда 2024 жылы Парижде өтетін Олимпиада ойындарының алдында омыртқа жарақатын алып, аламанға қатыса алған жоқ, дегенмен Франция алтын медаль иеленді.
Сәтті операциядан кейін спортшы қайта жасыл алаңға оралып, қазіргі таңда Францияның «Авенир Валенсиан» клубында өнер көрсетіп жүр.
