Қазір боксшы спорттан демалыс алып, жақындарымен уақыт өткізіп жатыр
Әлемдегі ең сұлу боксшылардың бірі саналатын қазақстандық Ангелина Лукас үнемі жұрттың назарында. Бірақ екінші аса жеңіл салмақта IBO нұсқасы бойынша әлем чемпионы өзіне деген ерекше назардан қымсынбайтынын, керісінше, бұл процесс өзіне ұнайтынын айтты.
«Маған халықпен сөйлесіп, пікір алмасып, суретке түсу ұнайды. Ешкімнің бетін қайтарған емеспін. Бұл біздің жұмыстың бір бөлігі», - деді ол 1bol.kz тілшісіне берген сұхбатында.
Сөйте тұра жігіттер қауымының боксшы қызбен танысуға батылы жете бермейтін көрінеді.
«Әдетте мені көріп қалса, суретке түсу туралы ғана өтініш білдіреді. Алайда таныса бермейді, ыңғайсызданатын болса керек. Әлде қорқа ма екен, білмеймін. Көбі боксшы қыздармен танысуға жүрексінеді, былғары қолғап киген адам өмірде де агрессияға бейім деп ойлайтын болар», - деді Ангелина.
Былғары қолғап шебері өзіне қандай жігіттер ұнайтыны туралы сауалға да жауап берді.
«Жігітім бар, ол да боксшы. Өзім осы салада жүргендіктен шығар, спортшылар жаныма жақынырақ. Басқа саладан болса да, қарым-қатынаста ең алдымен түсіністік керек. Сені шын түсінетін адамның қасыңда болғаны жақсы ғой», - деді боксшы.
Ангелина Лукас кәсіпқой бокста 12 жекпе-жек өткізіп, соның 11-де жеңіске жетті. Соңғы жекпе-жегін ол биыл қазанда аргентиналық экс-әлем чемпионы Анна Лопезге қарсы өткізіп, төрешілер шешімімен жеңіске жетті.
