Боксшы 28 ақпан күні рингке неліктен шықпағанын түсіндірді
Олимпиада чемпионы, қазақстандық кәсіпқой боксшы Данияр Елеусінов 28 ақпан күні айқасының өтпеу себебін түсіндірді.
Естеріңізде болса, жекпе-жек Астана қаласында ұйымдастырылуы керек еді. Алайда қарсылас соңына дейін белгісіз болған, бұл тыңғылықты дайындық жасауды қиындатқан. Одан қалды АҚШ-қа сапары да оның бабына еніп үлгермеуіне себеп болған.
«28 ақпан күні шаршы алаңға шығуым керек болған. Соңына дейін қарсылас та белгісіз болды. Бұл жерде All Stars-тың еш кінәсі жоқ, бәрін ұйымдастырғысы келді. Мен де рингкте өнер көрсеткім келді. Бірақ маған АҚШ-қа бару керек еді. Ары-бері жүру біраз уақыт алды, одан қалды джетлаг тағы бар. Уақыь белдеуіне үйренуің керек дегендей. Шаршы алаңға соңына дейін шығамын деген жоспар болды, алайда бабым дұрыс болмағандықтан, жекпе-жекті кейінге шегеру туралы шешім қабылдадым», - деді Елеусінов.
Боксшы жанкүйерлерінен кешірім сұрады.
«Менің жекпе-жегімді көремін деп келген барша жанкүйерімнен басымды иіп кешірім сұраймын. Келесі жолы сақадай сай боламын», - деп сендірді Данияр.
