Жәнібек Әлімханұлының қолы жетпеген әлем чемпионы өзге қазақ боксшысымен жұдырықтасады

03.04.2025, 09:42

Жекпе-жек биыл жазда өтуі мүмкін

Жәнібек Әлімханұлының қолы жетпеген әлем чемпионы өзге қазақ боксшысымен жұдырықтасады
Getty Images

Кәсіпқой бокстан орта салмақта WBC тұжырымы бойынша әлем чемпионы доминикалық Карлос Адамес (25-1-1, 18 KO) чемпиондық титулын қорғау үшін қазақ боксшысы Мейірім Нұрсұлтановпен (20-0, 11 KO) жекпе-жек өткізуі тиіс. WBC ұйымының басшылары қос боксшыға келісімге келуге 6 мамырға дейін уақыт берді.

Айта кетейік, соңғы рет Адамес 22 ақпанда рингке шыққан болатын. Ол кезде доминикалық боксшы жеңіліп көрмеген британдық Хамза Ширазбен жұдырықтасып, төрешілер тең нәтиже тіркеді.

Енді Адамес чемпиондық титулын қайта қорғауы керек. Егер оның менеджері Нұрсұлтановтың менеджерімен келісімге келе алмаса, онда WBC-дің өзі бәссауда өткізіп, жеңіске жеткен тарап жекпе-жекті өткізу құқығына ие болады.

Дәл осы салмақтың екі тұжырымы IBF және WBO бойынша әлем чемпионы – Жәнібек Әлімханұлы соңғы екі жылдан бері Карлос Адаместі чемпиондық жекпе-жекке шақырып келеді. Алайда, тараптар әлеуметтік желіде сөз таластырғанымен, іске келгенде ешқандай келісімге келе алмады.

×
Жаңалықтар Футбол Хоккей Бокс MMA Теннис Баскетбол Ұлттық спорт Матч-болжам