Жуырда оған қырғыз билігі құрмет көрсетіп, сый-сыяпат жасаған болатын
Кәсіпқой бокстан жартылай ауыр салмақта әлемнің абсолютті чемпионы Дмитрий Бивол туған жері Қырғызстанда кездесу өткізеді. Бұл туралы спортшының өзі мәлімдеді.
Боксшы алдағы күндері Қырғызстанның Тоқмақ қаласына келуді жоспарлап отыр. Аталған шағын қала Қырғызстанның Қазақстанмен түйіскен шекарасында орналасқан.
«Тура 6 сәуірде Тоқмақ қаласының орталық алаңында сіздерді асыға күтеміз», - деп жазды Бивол әлеуметтік желіде.
Дмитрий Бивол 1990 жылы Қырғызстанның Тоқмақ қаласында дүниеге келген. Шағын қалада бокс әліппесін таныған белгілі спортшы алғашқы жарыстарына Қырғызстан мен Қазақстанда қатысқанын сұхбаттарында айтқан болатын.
Кейін Ресейге отбасымен қоныс аударған ол сол елдің атынан сынға түсті. Соңғы рет әуесқой бокста 2013 жылы Қазанда өткен Универсиада ойындарында күміс жүлдегер атанды. Финалда жарақатына байланысты украиналық Александр Гвоздикке қарсы жекпе-жектен бас тартқан.
Ресей әскері Украинаға басып кіргеннен кейін Бивол кәсіпқой бокста Қырғызстан туын көтеріп шыға бастады. Боксшы туған жеріне жиі келеді.
