«Қайратты» Чемпиондар лигасына шығарған Темірлан Анарбековке көлік сыйлады

Алматылық «Қайрат» футбол клубының жас қақпашысы Темірлан Анарбеков ерекше сыйға ие болды. Оған Zigi Zagi компаниясы қақпашыға заманауи автокөліктің кілтін табыстады.

Компания басшысы қақпашыға көліктің халық атынан беріліп жатқанын айтып, футболшының анасына да бір құшақ гүлін сыйлады.

«Барша қазақ халқына қолдауларыңыз үшін алғысым шексіз. Нәтиже менің ғана емес, бүкіл клубтың еңбегі деп ойлаймын. Сіздер бізге жанкүйер болған сайын біз барымызды саламыз», – деді Темірлан Анарбеков.

Темірлан Анарбеков соңғы айларда бірнеше маңызды матчта «Қайраттың» қақпасын сенімді қорғап, жанкүйерлердің зор ықыласына бөленген болатын. Іріктеу кезеңінде өз алаңында Шотландияның «Селтигін» жеңіп, Чемпиондар лигасының негізгі кезеңіне жолдама алған «Қайрат» клубының өкілдерімен Astana Motors компаниясының негізін қалаушы Нұрлан Смағұлов кездесіп, бас бапкер Рафаэль Уразбахтин мен қақпашы Темірлан Анарбековті арнайы құттықтаған еді.

Кәсіпкер екеуінің еңбегін ерекше атап өтіп, сыйлығын тарту етті. Уразбахтинге Hyundai Palisade көлігінің кілті табысталса, пенальти сериясында қарсыластың үш соққысын қайтарып, матчтың қаһарманы атанған Анарбековке Apple Macbook берілді. 

Айта кетейік, Анарбеков пенальти сериясында алдымен Адам Айданың соққысын қайтарса, кейін Маккованға қақпаны дәл көздеуге мүмкіндік берген жоқ. Сонан соң Маэданың добын қағып алып, «Қайратты» Чемпиондар лигасының топтық кезеңіне алып шықты. 

Ал Алматыдағы «Қайрат» пен «Ақтөбе» арасындағы Премьер-лиганың 23-тур ойынында күтпеген жағдай болды. Ойынның 10-минутында алматылық клубтың негізгі қақпашысы әрі ұлттық құраманың ойыншысы Темірлан Анарбеков қарсылас Жайро Жанмен соқтығысып, ауыр жарақат алды. Қақпашының жақ сүйегі сынғаны анықталды.

Бұған дейін «Қайраттың» 18 жастағы қақпашысы Шерхан Қалмырза ерекше құрметке ие болды. Оған кәсіпкер Ұлықбек Шарипов заманауи Exeed көлігін сыйға тартқан.