«Оқжетпес» клубы Назарбаевтың тұсында танылған Иван Сауэр бастаған фермерлердің қарамағына өтті

Көкшетауда «Оқжетпес» футбол клубын коммерцияландыру және басқарудың жаңа моделіне көшіру процесі ресми түрде іске қосылды. Бұл туралы Ақмола облысының әкімі Марат Ахметжановтың төрағалығымен өткен жұмыс кеңесінде мәлім болды.

Жиында клубты басқарудың жаңа жүйесі таныстырылып, оның басты мақсаты – жергілікті бюджетке түсетін салмақты азайту екені айтылды.

Клубты реформалаудың негізгі құралы ретінде арнайы құрылған ФК «Оқжетпес» қоғамдық қоры ұсынылды. Қордың құрылтайшысы – елімізге белгілі аграрлық сала өкілі, «Родина» агрофирмасының директоры, Қазақстанның Еңбек ері Иван Сауэр.

Енді клубтың қаржыландыруы дәл осы қор арқылы жүзеге асады. Жоба бойынша «Оқжетпеске» қолдау көрсету үшін өңірдегі ірі ауыл шаруашылығы кәсіпорындары тартылмақ. Бұл клубтың бір ғана инвесторға тәуелді болмай, бірнеше кәсіпкерден тұратын пул арқылы тұрақты қаржылық негізге ие болатынын көрсетеді.

Клубты жаңа модельге көшіру мемлекет басшысы Қасым-Жомарт Тоқаевтың кәсіби спортты бюджет есебінен қаржыландыруды кезең-кезеңімен қысқарту туралы тапсырмасы негізінде жүзеге асырылуда.

Жаңа жүйе бойынша қандай өзгерістер болады?

• Қаржылық тұрақтылық: клуб енді өңірлік бизнес тарапынан тікелей қолдауға сүйенеді.

• Ашықтық: қор құрылымы демеушілердің қаржының жұмсалуын бақылауына мүмкіндік береді.

• Әкімдіктің рөлі: облыс әкімдігі реттеуші ретінде қалып, спорт ұйымы мен жеке сектор арасындағы үйлестіруді қамтамасыз етеді.

Жаңа басқару жүйесінде клубқа тұрақты түрде чемпионатта жақсы өнер көрсету және өз тәрбиеленушілерін дамыту міндеті қойылды. Сонымен қатар, қымбат легионерлерді сатып алу жоспарда жоқ екені атап өтілді.

Айта кетейік, Қазақстанда футбол клубтарын жекешелендіру процесі ел көлемінде жүріп жатыр. Бұған дейін:

• «Шахтер» клубын – Тимур Турлов,

• «Жеңіс» клубын – Михаил Ломтадзе,

• «Қызылжарды» – Сергей Кан,

• «Қайсарды» – Исламғали Қозбақов басқаруға алған.

Ал «Астана» клубына да инвестор табылғаны айтылып, оның есімі кейін жарияланатыны хабарланды.

Мемлекет кәсіби футболды жекешелендіру бағытын 2025 жылдан бастап белсенді түрде күшейтіп, басты мақсат ретінде бюджет шығынын қысқартып, бизнесті спортқа тартуды белгіледі.