Шакира Жерар Пикенің балаларымен кездесуіне қатысты жаңа талап қойып, сотқа жүгінді

Шакира мен «Барселонаның» бұрынғы қорғаушысы Жерар Пике Барселонадағы сот отырысына бірге қатысты. Бұрынғы жұп 13 жастағы Милан мен 11 жастағы Сашаның әкесімен кездесу тәртібін қайта қарау мәселесіне байланысты сотқа келді.

Қазір балалар анасымен бірге Майамиде тұрады. Қолданыстағы келісім бойынша Пике ұлдарымен кездесіп тұру үшін Барселонадан АҚШ-қа барып келеді, ал балалар да әкесін көру үшін Испанияға ұшады.

Шакираның тарапы балалардың қысқа мерзімге байланысты Майами мен Барселона арасында жиі ұшуына қарсы. Әншінің пікірінше, ұзақ трансатлантикалық сапарлар мен уақыт белдеуінің ауысуы балалардың оқуына, күнделікті тәртібіне және әлеуметтік өміріне қосымша салмақ түсіреді.

Сондықтан Шакира соттан кездесу тәртібін қайта қарауды сұрап отыр. Оның ұсынысы бойынша, балаларды Барселонаға қайта-қайта ұшырудың орнына, Пике демалыс кезінде Майамиге өзі барып, ұлдарымен сол жерде уақыт өткізгені дұрыс.

«Бұл ұсыныс балалардың ата-анасымен өткізетін уақытын қысқартуға бағытталмаған. Керісінше, Майами мен Барселона арасындағы сапарларды жеңілдету көзделіп отыр. Бірнеше күнге созылатын демалыс кезінде Майамиге ата-ананың өзі барғаны дұрыс. Осылайша балалар қысқа мерзімге байланысты трансатлантикалық сапарлардан және оның салдарынан туындайтын қиындықтардан сақталады», – делінген Шакираның заңгерлері таратқан мәлімдемеде.

Әншінің тарапы бұл өзгеріс балалардың мектептегі оқуын, әлеуметтік ортасын және қалыпты отбасылық өмірін сақтауға мүмкіндік береді деп есептейді. Сонымен қатар ұсыныстың басты мақсаты – олардың эмоционалдық және физикалық жағдайына түсетін салмақты азайту.

Испаниялық БАҚ-тың хабарлауынша, мәселе сотқа жетпей тұрып бірнеше ай бойы талқыланған. Екі тараптың адвокаттары судья мен прокуратураның қатысуымен келісімге келуге тырысқанымен, ортақ шешім табылмаған.

Сот отырысына Шакира мен Пике жеке өздері қатысты. Алдымен сот ғимаратынан Пике шықты. Бұрынғы футболшының көңіл-күйі жақсы көрінгенімен, журналистердің сұрақтарына жауап бермеді. Шакира да соттан кейін пікір білдіруден бас тартты.

Әзірге соттың соңғы шешімі жарияланған жоқ.

Шакира мен Пике қашан ажырасты?

Шакира мен Жерар Пике 2010 жылы әлем чемпионатына арналған «Waka Waka» әнінің бейнебаянын түсіру кезінде танысқан. Екеуі он жылдан астам уақыт бірге болып, екі ұл тәрбиеледі.

2022 жылғы маусымда жұп қарым-қатынасын тоқтататынын мәлімдеді. Кейін балалардың Шакирамен бірге Майамиде тұруы туралы келісім жасалып, Пикеге олармен тұрақты түрде кездесіп тұру құқығы берілді.

Милан мен Саша 2023 жылдың сәуірінен бері анасымен бірге Майамиде тұрады. Енді Шакира балалардың әкесімен кездесуі кезінде негізгі сапарды балалар емес, Пике жасағанын қалайды. Сот осы ұсынысқа қатысты шешім шығаруы тиіс.