Ол Қазақстандағы ең қымбат ойыншы атанып отыр
Жақында 16 жастағы қазақстандық футболшы Дастан Сәтпаев ресми түрде Лондонның «Челси» клубының ойыншысы атанған еді. Енді оның «ақсүйектер» клубынан алатын жалақысы белгілі болды.
Sports.ru сайтының мәліметінше, трансфер сомасы 4,3 миллион еуроны құраған. Ал ойыншының өзі үшін келісімшарт бойынша айына 14 мың фунт (шамамен 8,7 миллион теңге) мөлшерінде жалақыға кепілдік береді. Осылайша, бұл Қазақстан футбол тарихындағы ең қымбат трансфер болып отыр.
Алайда, 2026 жылға дейін Сәтпаев өзінің туған клубы «Қайратта» өнер көрсетеді, сөйте тұра «Челси» жаттықтырушысымен жеке бағдарлама бойынша жұмыс істейтін болады. Ал оның матчтарға қатысуы Лондон клубымен келісіледі.
Келісімшартта ойыншының жалақысы ата-анасына жіберіледі, ал Дастанның өзі бұл қаражатқа 22 жасқа толғаннан кейін ғана қол жеткізе алады деп жазылған. Жас футболшы кәмелетке толғанға дейін Қазақстанда болады, содан кейін «Челсиге» ауысады.
