Дастан ең жоғары ұпай жинаған
Қазақстан Премьер-лигасының сәуір айындағы үздіктері белгілі болды. Кәсіби клубтар арасында жарыстар өткізу дирекциясы «Айдың үздік ойыншысы» мен «Айдың үздік бапкері» аталымдарының иегерлерін ресми түрде жариялады.
Айдың үздік ойыншысы — «Қайраттың» жас шабуылшысы Дастан Сәтпаев. Ол клуб капитандары мен бапкерлерінің дауыс беру нәтижесінде ең жоғары ұпай жинап, жеке-дара үздік атанды. Айта кетейік, Дастан бұған дейін наурыз айында «Астана» ойыншысы Марин Томасовпен бірге үздік деп танылған болатын.
Сәуірде 16 жастағы Сәтпаев бес матчта төрт гол соғып, екі нәтижелі пас берген.
Ал айдың үздік бапкері атағы «Қайрат» командасының бас бапкері Рафаэль Уразбахтинге бұйырды. Оның жетекшілігіндегі ұжым сәуір айында бес кездесу өткізіп, төртеуінде жеңіске жетсе, біреуінде тең ойнаған. Осы аралықта алматылықтар қарсыластар қақпасына 13 гол соғып, өз қақпаларына небәрі 2 гол жіберген.
