Букмекерлерден пара алып ұсталған экс-шенеунікті Асқар Мамин қол астына қызметке алды

Қазақстан хоккей федерациясына бас директор болып Сәкен Мұсайбеков тағайындалды. Кезінде пара алып сотталған экс-шенеунік енді Асқар Маминнің қоластында қызмет атқарады.

Бұл туралы Қазақстан хоккей федерациясының баспасөз қызметі хабарлаған.

«Қазақстан хоккей федерациясы» республикалық қоғамдық бірлестігінің кезектен тыс республикалық конференциясының шешімімен Сәкен Жүнісбекұлы Мұсайбеков бас директор лауазымына сайланды. Сәкен Мұсайбеков спорт саласындағы мол басқару тәжірибесіне ие. Ол мәдениет және спорт вице-министрі, Қазақстан Ұлттық Олимпиадалық комитетінің бас хатшысы сынды маңызды қызметтерді атқарған. Оның көпжылдық тәжірибесі мен жоғары біліктілігі елімізде шайбалы хоккейді дамыту мен насихаттауға үлес қосады. Сонымен қатар, федерацияның халықаралық бағытын күшейту мақсатында Глеб Қаратаев Қазақстан хоккей федерациясы вице-президенті болып тағайындалды», - деп жазылған федерацияның ресми сайтында.

Айта кетейік, Қазақстан хоккей федерациясын бұрынғы премьер-министр Асқар Мамин басқарады. Оны ел президенті Қасым-Жомарт Тоқаев «Қаңтар оқиғасынан» кейін қызметінен алып тастаған болатын. Содан бері Мамин хоккей федерациясындағы қызметін ғана атқарып келеді.

Ал, Сәкен Мұсайбеков 2021 жылы қылмыстық кодекстің 190-бабы 3-бөлігінің 1-тармағы бойынша ірі көлемде алаяқтық жасады деп айыпталған болатын. Ол букмекерлік қызмет саласындағы мүдделерге қолдау көрсеткен және жалпы қамқорлығы үшін пара алған. Пара ретінде «Exirius» ЖШС басшысы Заңғар Медеуов оған 6,2 млн теңге берген. Оның 4 миллионына Hermes әйелдер сөмкесі сатып алынған.

Кейін Мұсайбеков кінәсін мойындап, мемлекетке 62 млн теңге көлемінде айыппұл төлеп құтылған еді.