Қысқы құрлық ойындарында хоккей жарысы 7-14 ақпан аралығында өтеді
Қазақстан хоккейінде ресейлік ойыншыларды натурализация жасау тоқтамай тұр. Бұл жолы Вячеслав Колесников есімді ойыншыға азаматтық берілді.
Ол енді Қытайдың Харбин қаласында өтетін Азия ойындарында Қазақстан намысын қорғамақ. Қысқы құрлық ойындарында хоккей жарысы 7-14 ақпан аралығында өтеді. Қазақстанның қарсыластарының қатарында Қытай, Жапония, Оңтүстік Корея, Таиланд және Қытайлық Тайпэй бар.
24 жастағы Колесников Челябі хоккей мектебінің түлегі. Биылғы маусымда «Номад» сапында Pro Hokei Ligasy жарысында ойнап жүр. Ол 34 матчта 24 (12+12) ұпай жинады. Қазақстанға 2021 жылы келген. «Номадқа» дейін «Құлагер», «Арлан» командаларында, Ресейде «Спутник» және «Ермак» клубтарында өнер көрсеткен.
Соңғы кездері хоккейшілердің арасында Қазақстан азаматтығын алған жалғыз Колесников емес, осының алдында тағы бір экс-ресейлік Егор Наместников та Азия чемпионатында ел намысын қорғаған.
