Финалда біздің қыздар бұған дейін жеңіліп қалған Вьетнам волейболшыларымен тағы ойнайды
Филиппин астанасы Манилада өтіп жатқан волейболдан Challenge Cup турнирінде Қазақстан әйелдер құрамасы финалға шықты.
Сара Анарқұлова бастаған қыздар жартылай финалда жарыс қожайыны –Филиппин командасымен сынға түсті. Бұл кездесуде жерлестеріміз үш партияда оңай жеңді. Қорытынды есеп – 3-0 (25-23, 25-21, 25-14).
Матчта ең көп ұпайды Сана Анарқұлова жинады (19 балл). Одан кейін Светлана Николаева 11 нәтижелі әрекет жасады. Қарсылас сапындағы үздік – Ара Паник (14 ұпай).
Ришат Гилязутдинов баптайтын біздің команда турнирдің топтық кезеңінде Индонезия, Гонконг, Сингапурды ойсырата ұтқан. Ал екінші матчта Challenge Cup-тың қазіргі чемпионы Вьетнамға жол берген. Енді 29 мамырда Астана уақытымен 16:00-де финалда кім мықтыны анықтайды.
Топтық бәсекеде қазақстандықтар Вьетнам қыздарына 1:3 есебімен есе жіберген еді. Енді біздің құраманың қарымта қайтаратындай мүмкіндігі бар.
Айта кетейік, Қазақстан құрамасы Challenge Cup бәсекесіне алғаш рет қатысып жатыр. Финалды Qazsport телеарнасы тікелей эфирде көрсетеді.
