Әзірбайжан спортшылары Париж олимпиадасының медальдарын кері қайтаратын болды

Әзірбайжан Ұлттық Олимпиада комитеті Париж Олимпиадасында спортшылары иеленген бес медальды кері қайтаруға өтініш беретінін мәлімдеді.

Мұндай қадамға спортшылар иеленген жүлденің сапасы себеп болып отыр. Осыдан кейін Халықаралық Олимпиада комитетіне қайтару туралы өтініш беруге әзірлік басталған.

Әзірбайжан Ұлттық Олимпиада комитетінің баспасөз хатшысы Мурад Фарзалиевтің айтуынша, екі спортшының жүлдесі ғана қалыпты күйінде.

«Хидаят Гейдаров пен Магомедхан Магомедовтен басқа спортшыларымыздың медалдерінің сапасы нашар екені байқалды. Халықаралық Олимпиада комитетіне барлық спортшымызды жаңа медальмен қамтамасыз етілуі үшін өтініш жасаймыз», – деді ол.

Әзірбайжан спортшылары Париж Олимпиадасында жеті медаль иеленді. Оның ішінде екі алтын, екі күміс және үш қола жүлде бар. Команда сапында дзюдошылар Қарағанды қаласында дүниеге келген Хидаят Гейдаров пен осетиялық легионер Зелим Котсоев Олимпиада чемпионы атанса, таеквондошы Гашим Магомедов жарақатына байланысты шешуші кездесуде жеңіліп, күміс жүлдеге ие болды. Сондай-ақ, боксшы кубалық легионер Лорен Альфонсо Домингес күміс, грек-рим күресінің балуаны Хасрет Джафаров, еркін күрес шеберлері Георгий Мешвилдишвили мен Магомедхан Магомедов қола жүлдеге қол жеткізді.

Сондай-ақ, Әзірбайжан ұлттық олимпиадалық командасы жалпы есепте 30-шы орынға тұрақтады.

Бұған дейін әлемнің жүздеген спортшысы Париж Олимпиадасында иеленген жүлделерінің сапасына қатысты шағым айтқан болатын. Олар иеленген медальдар ай өтпей жатып, бояуы кеткен. Сондай-ақ, кейбір қола жүлделер қарая бастаған. Осыдан кейін Францияда Олимпиада ұйымдастыруға жауаптылар өтінім берген спортшылардың жүлдесін сапалы медальға ауыстыратындығын хабарлады.