Нұрлан Үсенов пен Азамат Мұқашов алтын жүлдеге қол жеткізді
Лос-Анджелесте (АҚШ) өткен ірі халықаралық жарыста қазақстандық дзюдошылар ел мерейін үстем етті. Олар екі алтын және бір күміс медаль жеңіп алды. Бұл туралы ҚазАқпарат тілшісі жазды.
66 келіге дейінгі салмақта Нұрлан Үсенов, ал 81 келіге дейінгі салмақта Азамат Мұқашов алтын жүлдеге қол жеткізді. Ал 73 келіге дейінгі салмақта Бақыткелді Қасенов күміс жүлдені еншіледі.
Бақыткелді Қасеновтің айтуынша, ол финалдық белдесуге жарақатпен шыққан. Бұл жағдай нәтижеге айтарлықтай әсер еткен.
«Тек жігер мен ынта жеткіліксіз болды. Финалда жарақатым мазалап, толық мүмкіндігімді көрсете алмадым. Енді оңалуға уақыт бөліп, қалпыма келіп, алдағы жарыстарға тың дайындықпен ораламын», - деді Қасенов.
Ол сондай-ақ, өзге спортшылардың жоғары деңгейде өнер көрсеткенін ерекше атап өтті.
«Нұрлан Үсенов қарсыластарын сенімді жеңіп, тамаша өнер көрсетті. Ол өз тәжірибесінің арқасында лайықты түрде чемпион атанды. Ұлттық құрама сапында ұзақ жылдар бойы дайындалғаны көрініп тұр. Азамат Мұқашов та өз шеберлігін дәлелдеп, лайықты жеңіске жетті», - деп түйіндеді Бақыткелді Қасенов.
