Беларусь билігіндегілер Арина Соболенконы WTA жарыстарынан шеттетуді талап етті

Әлемнің екінші ракеткасы Арина Соболенко украиналық Элина Свитолинадан жеңілгеннен кейін дау ортасында қалды. Беларусь теннисшісінің матчтан кейінгі әрекеті әлеуметтік желіде қызу талқыланып, Беларусь Ұлттық дағдарысқа қарсы басқармасының жетекшісі, Біріккен өтпелі кабинеттің жетекшісі орынбасары Павел Латушко оны WTA аясындағы барлық жарыстан шеттетуді талап етті.

Әлеуметтік желінің X платформасында матчтан кейін түсірілген үш секундтық видео тарады. Кадрларда Соболенконың жеңілістен кейінгі эмоциялық реакциясы байқалады. Кейбір қолданушылар теннисші украиналық қарсыласына балағат сөз айтқан болуы мүмкін деп болжаған. Алайда видеодағы сөздердің нақты мазмұны әзірге расталған жоқ.

Бұл жағдайға Павел Латушко да назар аударды. Ол Беларусь спортшысының әрекетін қатаң сынға алып, WTA басшылығын Соболенкоға қатысты шара қолдануға шақырды.

«Беларусь теннисшісі Арина Соболенконың әрекеті мүлдем орынсыз! Ол Украинаға қарсы агрессиялық соғысты да, беларусь халқына жасалып жатқан жаппай қуғын-сүргінді де айыптаған жоқ. Саяси тұтқындарды, соның ішінде әйелдерді босатуды қолдамады. Енді соғыс пен жойқын шабуылдарға ұшырап отырған украиналықтарды қорлайды», – деп жазды Латушко X желісінде.

Оның пікірінше, қалыптасқан жағдайға берілетін тиісті жауап – Соболенконы WTA аясындағы жарыстардан шеттету. Сондай-ақ ол теннисшінің әрекеті Беларусь халқына абырой әкелмейтінін мәлімдеді.

Айта кетейік, Соболенконың саяси ұстанымы бұған дейін де бірнеше рет талқыланған. 2023 жылдың маусымында «Ролан Гаррос» турнирінде Элина Свитолинаны жеңгеннен кейін Беларусь теннисшісі Александр Лукашенконы қолдамайтынын айтқан еді.

Ал 2026 жылдың тамызында Time журналына берген сұхбатында Соболенкодан саясатқа қатысты тағы да пікір сұралған. Ресейдің Украинаға қарсы кең ауқымды соғысына қатысты ол ешкім соғысты қолдамайтынын мәлімдеген. Алайда Владимир Путинмен одақтастық қарым-қатынастағы Александр Лукашенкоға көзқарасы туралы тікелей қойылған сұраққа жауап беруден бас тартқан.