Ол төрт рет WTA турнирлерін жеңіп алған
Танымал италиялық теннисші Камила Джорджи 32 жасында мансабын аяқтау туралы шешім қабылдады.
Әзірге теннисшінің өзі ресми түрде ешқандай мәлімдеме жасаған жоқ. Дегенмен, оның есімі Теннистегі адалдықты қамтамасыз ету жөніндегі халықаралық агенттіктің (ITIA) сайтында мансабын аяқтаған теннисшілер тізімінде пайда болған. Джорджи карьерасын аяқтаған уақыт деп 7 мамыр көрсетілген.
Джорджидің теннистегі басты жетістігі деп 2021 жылы Монреальда өткен WTA 1000 турниріндегі жеңісін айтуға болады. Әлемдегі ең сұлу теннисшілердің бірі саналатын Камила төрт WTA турнирінде топ жарған.
Үлкен дулыға санатындағы аламанда ол 2018 жылы Уимблдонның ширек финалында өнер көрсетті. Сол жылы ол WTA рейтингінде 26-орынға көтерілді, бұл оның жеке рекорды.
