Азия чемпионатына қатысатын қазақ боксшыларының қарсыласы белгілі болды

Бокстан бүгін Таиландта басталған Азия чемпионатында сынға түсетін Қазақстан боксшыларының қарсыластары анықталды. 29 қараша мен 11 желтоқсан күндері аралығында Таиланд Корольдігінің Чиангмай қаласында өтетін сында 13 салмақта 117 спортшы өз мүмкіндігін сынап көрмек.

Қазақстан мен Өзбекстан құрамасының 8 боксшысы финалда кездесуі әбден мүмкін.

Отандастарымыздың қарсыластары кім болуы мүмкін екені анықталды.

48 келіде Санжар Тәшкенбай 1/4 финалдан бастайды. Оның қарсыласы тәжікстандық Мехрон Шафиев пен қырғыз боксшы Анваржан Ходжиев жұбының жеңімпазы болады.

51 келі Сәкен Бибосынов ширек финалда өзбек Асылбек Жалилов пен моңғол Давадорж Лхагапдоржтың қай жеңгенімен шеберлік байқасады.

54 келіде Махмұд Сабырхан 1/8 финалда тайвандық Ян-Лин Леймен кездеседі.
 
57 келіде Оразбек Асылқұлов 1/8 финалда мьянмалық Зулхейлейн Мохамадпен сынға түседі. Егер жеңіске жетсе, ширек финалда Таиланд немесе Тайпек өкілімен жартылай финал жолдамасын сарапқа салады.

60 келіде Бибарыс Жексен іріктеу кезеңдерінде өзбекстандық Дилшод Абдумуродовпен айқасады. Ширек финалда Таиланд немесе Тәжікстан өкілімен кездеседі.

63,5 келіде Париж Олимпиадасына қатысушы Мұхаммедсабыр Базарбайұлы жарысты ширек финалдан бастамақ. Ол шаршы алаң иесі Сомчай Вонгсуванмен айқасады.

67 келіде әлем чемпионатының күміс жүлдегері Дулат Бекбауов 1/8 финалда тайваньдық Джиа-Джун Чиуан Вангқа қарсы жекпе-жекке өткізеді. Ширек финалға шықса жапониялық Шой Сомейаға қарсы айқасады.

71 келіде ұлттық құрамаға қайта оралған Абылайхан Жүсіпов ширек финалда тайваньдық Чиа-Хсин Лин мен түркпенстандық Байрамди Нұрмұхамедов жұбының жеңімпазымен кездеседі.

75 келі Диас Молжігітов ширек финалда Дайго Сунагамен шықса, 80 келіде Ерасыл Жақпеков ширек финалда қырғыз өкілі Сағын Сатыбалдыұлымен шеберлік байқасады.

86 келіде әлем чемпионы Бекзат Нұрдәулетов бірден жартылай финалдан жарысты бастайды. Оның қарсыласы БАӘ-нің өкілі Данило Жасан болмақ.

92 келіде Сағындық Тоғамбай ширек финалда өзбекстандық, әлем чемпионатының қола жүлдегері Мадияр Сайдрахимов пен қытайлық Теймиао Людің өзара мықтысымен кездеседі.

Аса ауыр салмақта Айбек Оралбай бірден жартылай финалда өзбек боксшысы Жахонгир Закировпен (Жастар арасында әлем чемпионы) финал жолдамасына таласады.