Ол 2021 жылы менеджерлерімен арасындағы даудың салдарынан үш жылдай рингке шыға алмай қалған еді
Кәсіпқой боксшы Данияр Елеусінов (12-0, 7 КО) UFC президенті Дана Уайттың жаңа бокс промоушенімен ресми келісімшартқа отырды.
«Данияр Елеусінов – Дана Уайттың жаңа бокс лигасымен келісімшарт жасаған алғашқы қазақстандық боксшы», - деп хабарлады All Stars Boxing промоутерлік компаниясы.
Жақында Дана Уайт Сауд Арабиясының промоутерлерімен бірігіп, жаңа бокс лигасының құрылғанын жариялаған болатын. Бұл жоба қазіргі төрт ірі бокс ұйымының жүйесінен ерекшеленеді. Онда әр салмақ бойынша тек бір ғана чемпион болады.
Айта кетейік, Данияр Елеусінов IBO тұжырымы бойынша бұрынғы әлем чемпионы. Ол осы наурыз айында Астанада өткен бокс кешінде кезекті жекпе-жегін өткізуі керек болған. Алайда, бұл жекпе-жек өтпей қалды.
Данияр Елеусінов кәсіпқой бокстағы мансабын 2018 жылы бастаған. 2021 жылы IBO тұжырымы бойынша әлем чемпионы атағын жеңіп алғаннан кейін менеджерлерімен соттасып, бірнеше жыл рингке шыға алмай қалды. Қазір боксшының жасы 34-те.
