Астана әкімі екі боксшыға 30 млн теңгеден сыйақы берді

Астана қаласының әкімі Жеңіс Қасымбек Instagram парақшасында әлем чемпионатында медаль алған боксшыларды құттықтағанын жазды. Айбек Оралбай мен Санжар Тәшкенбайға 30 миллион теңгеден сыйақы табысталды.

«Астаналық спортшыларымыз Ливерпульде (Ұлыбритания) бокстан өткен 2025 жылғы әлем чемпионатында алтын медальдар жеңіп алды. Санжар Тәшкенбай екі дүркін әлем чемпионы атанды. Санжар алғаш рет 2023 жылы 19 жасында 48 кг салмақ дәрежесінде әлем чемпионатын жеңіп алған еді, екі жылдан кейін бұл жетістігін Ливерпульде 50 кг салмақта қайталап отыр. Айбек Оралбай өз есімін Қазақстан спорты тарихында алтын әріптермен жазды. Ол әлем чемпионатында суперауыр салмақта ел тарихындағы тұңғыш алтын медальді жеңіп алды. Нәтижесінде еліміз жалпы есепте бірінші орынға шығып, 7 алтын, 1 күміс және 2 қола медаль жеңіп алды», – деп жазды қала әкімі.

Сондай-ақ биыл елордада Бекзат Саттарханов атындағы Спорт кешені пайдалануға берілгенін атап өтті.

«Спортшыларымыз намысты қолдан бермей, керемет нәтиже көрсетті. Олар өз үлгісімен еңбектің, тәртіптің және өзіне деген сенімнің үлкен жетістіктерге апаратынын көрсетті. Бұл жетістіктерге бапкерлерінің де қосқан үлесі зор. Астана ылғи да спортты қолдап, талантты спортшыларымыздың дамуына жағдай жасап келеді. Мәселен, қаламызда Боксты дамыту орталығы бар, ал биыл Бекзат Саттарханов атындағы Спорт кешені пайдалануға берілді. Сіздерді осы жеңістеріңізбен тағы да шын жүректен құттықтаймын! Алда сіздерге үлкен табыстар, жаңа жетістіктер мен биік белестер тілеймін!», – деп жазды Жеңіс Қасымбек.

Айта кетейік, Махмұд пен Төрехан Сабырханға Шымкент әкімдігі автокөлік пен пәтер кілтін табыстағанын жазған едік.