Норвегия құрамасы АҚШ-қа бір тоннадан астам азық-түлік алып барды

Норвегия ұлттық құрамасы футболдан 2026 жылғы әлем чемпионатына ерекше дайындықпен келген командалардың бірі болып отыр. БАҚ мәліметінше, скандинавиялықтар АҚШ-та өтіп жатқан турнирге өздерімен бірге бір тоннадан астам азық-түлік пен жеке аспазын алып келген.

Норвегия делегациясының мұндай шешім қабылдауына футболшылардың үйреншікті тамақтану тәртібін сақтап, турнир кезінде ағзаға түсетін қосымша салмақты азайту мақсаты себеп болған. Команда жергілікті тағамға толықтай бейімделіп кетуге тәуекел етпей, негізгі өнімдерді өз елінен жеткізуді жөн көрген.

Хабарларға қарағанда, Норвегия құрамасының АҚШ-тағы базасына 1000 келіден астам азық-түлік жеткізілген. Оның ішінде 6000 дана апельсин, 300 келі атлантикалық лосось пен ақ балық, сондай-ақ 116 келі дәстүрлі норвегиялық қоңыр ірімшік – бруност бар. Бұл өнімдер футболшылардың қалпына келуіне, энергия қорын толықтыруына және күнделікті рационын тұрақты ұстауына көмектеседі.

Командамен бірге арнайы жеке аспаз да барған. Ол футболшылардың жаттығу жүктемесі, ойын кестесі және қалпына келу процесін ескере отырып, тағамдарды жеке бақылауда дайындайды. Норвегия штабы үшін бұл тек тамақ мәселесі емес, спортшылардың физикалық жағдайы мен психологиялық жайлылығын сақтаудың бір бөлігі саналады.

Норвегия құрамасы әлем чемпионатындағы алғашқы ойынын сәтті бастады. Топтық кезеңнің бірінші турында скандинавиялықтар Ирак құрамасын 4:1 есебімен жеңді. Енді Норвегия алдағы матчтарда Сенегал және Франция құрамаларымен кездеседі.

Айта кетейік, Норвегия құрамасы әлем чемпионатына 1998 жылдан бері алғаш рет қатысып отыр. Сондықтан команда турнирге барынша мұқият дайындалып, алаң сыртындағы әрбір ұсақ детальға дейін мән беруде.

2026 жылғы әлем чемпионаты АҚШ, Канада және Мексикада өтіп жатыр. Топтық кезең қорытындысы бойынша әр топтан үздік екі команда, сондай-ақ үшінші орын алған құрамалардың ішіндегі ең үздік сегізі плей-офф кезеңіне жолдама алады.