Бақтиер Зайнутдинов бұл матчқа қатыса алмайды
Футболдан Қазақстан ұлттық құрамасының бас бапкерінің міндетін атқарушы Али Алиев әлем чемпионатының іріктеу кезеңінде Уэльспен өтетін матч қарсаңында команданың көңіл күйі туралы айтты.
Қос құрама топтық кезеңдегі алғашқы матчты 22 наурызда Уэльс астанасында өткізеді.
«Баршаңызды Наурыз мерекесімен құттықтаймын. Матч алдында ойыншылар әрдайым ерекше эмоцияға толы болады. Жігіттер жаңа тарихты жазғысы келеді. Жаттығу барысында ұжымның Еуропа чемпионатының іріктеу кезеңіндегі қуанышты сәттерді қайтадан сезінгісі келетіні байқалды. Әлі құрамды таңдауды ойластырып жатырмыз. Жаттығу кезінде нақтылайтын кейбір жайттар бар. Біз үшін «джокер» бола алатын ойыншылар да жеткілікті», - деді бас бапкер баспасөз конференциясында.
Айта кетейік, бұған дейін шабуылшы Рамазан Каримов пен қорғаушы Роман Асранқұловтың жарақатына байланысты Уэльс және Лихтенштейнмен өтетін матчттарға қатыса алмайтыны айтылған. Сондай-ақ, ұлттық құрамаға Бахтиер Зайнутдинов пен Әлібек Қасым да көмектесе алмайды.
