«Суперлигада ойнауы керек»: түркиялық жанкүйерлер Анарбековті шақыртуды талап етуде

Қазақстан құрамасы мен «Қайрат» қақпашысы Темірлан Анарбеков Түркия жанкүйерлерінің қызу талқысына түсті. Түркиялықтар қазақстандықтың Чемпиондар лигасы іріктеуінің плей-офф кезеңінде «Селтикке» қарсы қарымта ойынындағы шеберлігіне ерекше тәнті болған.

Алматыда өткен матчта Анарбеков негізгі және қосымша уақытта қақпасына құрғақ сақтаса, пенальти сериясында үш соққыны қайтарып, «Қайраттың» тарихында алғаш рет Чемпиондар лигасының негізгі кезеңіне жолдама алуына көмектесті.

Түркияда қазақстандық қақпашының ойынын жоғары бағалап, оны Суперлига клубтарында көргісі келетінін жазып жатыр. X әлеуметтік желісінде жанкүйерлер «Галатасарай» мен «Трабзонспор» басшылығын Темірланға назар аударуға шақырды. Кейбірі оны тіпті «Галатасарай» қызығушылық танытқан жас бельгиялық Сенне Ламменстен де жоғары қойған. «25 миллион еуроға Ламменстен гөрі, 5 миллионға Анарбековті алған дұрыс» деген пікірлер де айтылуда.

Сонымен қатар, Темірланды «Трабзонспордың» қақпашысы Угурджан Чакырмен және «Фенербахче» мен Хорватия құрамасының негізгі голкипері Доминик Ливаковичпен салыстырып жатқандар бар.

Чемпиондар лигасының топтық кезеңінде алматылықтар мықтылармен бақ сынайды: өз алаңында мадридтік «Реал», бельгиялық «Брюгге», гректің «Олимпиакосы» мен кипрлік «Пафосты» қабылдап, сырт алаңда миландық «Интер», лондондық «Арсенал», лиссабондық «Спортинг» және даниялық «Копенгагенмен» ойнайды.

Айта кетейік, бұған дейін Түркия чемпионатында Қазақстан құрамасының екі ойыншысы өнер көрсеткен: Бахтиер Зайнутдинов «Бешикташ» сапында, ал Абат Аймбетов «Адана Демирспорда» ойнады. Алайда қазір екеуі де Суперлигадан кетіп қалған.