«Үш аптада қалыпқа келеді»: Макс Корж «Реалдың» алдында Алматыдағы стадионда концерт өткізеді

Беларусь әншісі Макс Корждың командасы 6 қыркүйекке жоспарланған Алматыдағы концертіне қатысты туындаған мәселеге түсініктеме берді.

Әртіс өкілдерінің айтуынша, іс-шараны өткізуге қажетті барлық талаптар техникалық та, заңдық та тұрғыдан толық сақталған. Бұл туралы Orda.kz жазды.

Техникалық директор Арнис Гринбергстің айтуынша, концерт Алматыдағы Орталық стадионның төсенішіне ешқандай қауіп төндірмейді.
 

«Макс Корж тек UEFA-ның ең жоғары санаттағы стадиондарында өнер көрсетеді. Төсенішті сақтау мәселесі бізге жақсы таныс. Менің мәліметім бойынша, Алматыда арнайы ауа келіп тұратын жабынды қолданылады. Ол көгалға зиян келтірмейді. Егер тамыр жүйесі зақымданбаса, төсенішті қалпына келтіру үшін үш апта жеткілікті», – деді ол.

Гринбергс сонымен қатар техникалық тұрғыда концерт Мадридтің «Реалымен» өтетін ойынға кедергі келтірмейтінін атап өтті.

Ал команданың заңгері ұйымдастырушының концертті өткізуге қажет барлық міндеттемелерін орындағанын мәлімдеді: барлық рұқсаттар алынған, алдын ала төлем жасалған.

«Қазіргі күні және уақыт бойынша стадионды жалға алу келісімі күшінде. Оны біржақты бұзуға еш негіз жоқ. Келісім бойынша жалғыз себеп – сол күні стадионда футбол матчының өтуі ғана. Қазір мұндай себеп жоқ. Оның үстіне, концерттің тоқтатылатыны жөніндегі ақпарат тек Instagram желісінде ғана шықты. Бұл келісімді бұзудың заңды тәсілі болып табылмайды», – деді заңгер.

Макс Корждың командасы стадион әкімшілігінің келісімшартты орындайтынына үміт артып отыр және концерт белгіленген күні өз күшінде қалатынын растады.

«Қайрат» Мадридтің «Реал» клубын 30 қыркүйекте қабылдайды.