Балаларды Ресейге жіберуден бас тартқан «Барыс» ХК басшысы министрлікке шақыртылды

«Барыс-2011» жасөспірімдер құрамасының ата-аналары басшылық балаларын Ресей чемпионатының плей-офф кезеңіне жіберуден бас тартқанын айтып, шағымданды.

Әлеуметтік желіде жарияланған ата-аналар үндеуінде «Барыс» хоккей клубының басшылығы бұл шешімді «жабық есік жағдайында» қабылдағанын айтады.

«Біз – 2024 жылдың желтоқсан айының соңында үлкен жетістікке жеткен «Барыс-2011» балалар хоккей командасының ата-аналарымыз. Біздің балаларымыз Ресей федерациясы біріншілігінің Орал федералдық округінің үздіктер тобындағы плей-офф кезеңіне шықты. Алайда 6 қаңтарда «Барыс» ХК басшылығы қаржыландырудың жоқтығына байланысты плей-оффқа қатысудан бас тарту туралы шешім қабылдады. Сонда ақша балалардың арманынан да маңызды нәрсе ма?» – делінген үндеуде.

Хоккейші балалардың мәселесіне назар аударған журналист Әділ Балтабаев клуб президентінің министрлікке шақыртылғанын мәлімдеді.

«ДЮСШ басшылығымен байланысқа шыға алмағандықтан, мен саяси басшылыққа сұрау жібердім. Бүгін «Барыс» ХК президенті Нұрлан Оразабаев Туризм және спорт министрлігіне шақыртылды. Кездесу барысында ДЮСШ тәрбиеленушілерінің Ресей чемпионатына қатысуын маусымның соңына дейін қаржыландыруды жалғастыру туралы шешім қабылданды. Осылайша, балалар жарысты аяқтай алады», – деп хабарлады ол.

Дегенмен «Барыс» ХК тарапынан балалар командасының Ресейдегі жарысқа қатысатыны туралы ресми ақпарат жарияланған жоқ.

Бұған дейін клуб «Барыс-2007», «Барыс-2009», «Барыс-2010», «Барыс-2011», «Барыс-2012» және «Барыс-2013» командаларын Ресей чемпионаттарынан шығарып тастаған болатын.

Ал 18 қаңтарда «Барыс-2011» плей-офф кезеңін «Югра» командасына қарсы сериямен бастауы тиіс.