«Ел күткен медаль». Нариман Құрбанов күміс жүлдеге қалай қол жеткізгенін айтып берді

Қазақстандық гимнаст Нариман Құрбанов 2024 жылғы Олимпиада ойындарының күміс жүлдесін жеңіп алды. Ол спорттық гимнастикадан жазғы ойындарда жүлде алған тұңғыш қазақстандық спортшы атанды. Құрбанов 18 жасынан бастап Олимпиададан жүлде алуды армандағанын айтады.

«Мен снарядқа келдім де комбинация басталар алдында бар жұмысты денеме арта салдым. Мимен ештеңе ойламай, тек соңына дейін жаттығуды орындай бердім. Мұның бәрінен қалай өткенімді өзім де түсінбей тұрмын. Ұзақ жылдар бойы жасап жүрген комбинацияны автоматты түрде орындап шықтым.  Қазіргі олимпиадалық циклді есепке алар болсақ, мен бағдарлама соңында жиі құлайтынмын. Бұл менің техникалық немесе тактикалық тұрғыдағы кемшілігім емес. Психологиялық тұрғыдан беріліп қоятынмын», - деді Нариман Құрбанов.

Ол алаңға шықпас бұрын қарсыластарсының бағасын көрмегені психологиялық тұрғыдан көмектескенін айтады.

«Бүгін бар тәжірибемді жинап, ең маңызды турнирде білгенімді түгел орындадым. Өзімнің спорттық мансабымда мен бағдарламаны бірінші де, соңғы да болып орындайтынмын. Менің бүгін ортаға бірінші шығып, алғаш боп атқа жақындағанымның ең үлкен артықшылығы – қарсыластардың бағасын көрмегенім. Осы жағынан қысым болмады. Егер мен ирландиялық спортшының 15,5 ұпай алғанын көрсем, қобалжи бастаушы едім», - деді Нариман Құрбанов.

Гимнаст қазақстандықтардың қуанып жатқанын көру ерекше бақыт сыйлайтынын атап өтті.

«Желіден Олимпиада медалін таныстырған соң, сол суретті сақтап қойдым. Осы маусымдағы әрбір жарыс алдында суретке қарап, армандайтынмын. Олимпиададан жүлде алу бала кезден бергі арман емес. 18 жасыма қарай жазғы ойындарға қатысып, жүлде алуға асыға бастадым. Мақсат қойдым. Сол мақсатқа жету үшін жұмыс істедім. Елімізде бұл медальді қалай қабылдайтынын, халықтың қалай қуанып жатқанын жақсы түсінемін. Қазір бұл медальді ұстағаннан гөрі, еліміздің қуанып жатқанын көру мен үшін бақыт», - деді Құрбанов.