Оның «былығы» көп еді дейді бапкерлердің өзі
Әйелдер күресінен Қазақстан құрамасының бас бапкері Қайрат Сағадиев танымал балуан Гюзель Манюровамен қарым-қатынасы жайлы айтты.
Бапкердің Sportbugin.kz сайтына берген сұхбатына қарағанда, Манюрова мықты балуан болғанымен, қыздар арасында іріткі салып кеткен.
«Манюрова жақсы спортшы, үш Олимпиададан медаль алды. Алайда, оның ел білмейтін де қылықтары бар еді. Әсіресе команданы бөлшектеп, іріткі салып кеткені бар.
Лондон Олимпиадасына дейін ол бұрынғы бас бапкер Саржан Жақсыбековпен арпалысып, ақыры 2012 жылдан кейін команда тізгінін өз қолына алды. Ал 2015 жылы мен бас бапкер болып келдім», - дейді ол.
Бас бапкерді Манюрова мойындағысы келмеген, сол үшін түрлі құйтырқы әрекеттер жасай бастаған көрінеді.
«Шыны керек, ол мені мойындамады. Бағынғысы келмеді. Түрлі нәрселер дайындай бастады. Содан соң мен Манюрованың бөлек жаттығуын талап еттім. Себебі, Рио Олимпиадасында жүлдесіз қалса, ол бар сәтсіздікті маған жаба салатын еді. Басшылық алғашында қарсы болды. Себебі, мұндай мүмкіндік тек қана Олимпиада чемпиондарына беріледі екен. Алайда, ыңғайын тауып, оның бөлек дайындалуына жол аштық», - деп атап өтті Сағадиев.
Маман балуан қыздың тым еркінсіп кетуіне басшылықтың да әсері болғанын айтады. Ақыр соңында ол құрамадан ғана емес, елден де кетіп қалған.
«Манюровамен ешқашан жақсы қарым-қатынаста болған емеспін. Қазақ бапкерлерінің қолынан ет асудан басқа ештеңе келмейді деп айтқан да сол еді. Оның асқақтап кетуіне өзіміз де кінәліміз. Командадағы көп қыздар Гюзельдің ықпалымен кетті, соған жағынуға тырысты. Мен әрдайым өз принциптеріме адал болуға тырыстым.
Қазір Манюрова елден кетіп қалды. Бізге келетін легионерлер секілді, ол да медалін алған соң, қайтып кетті. Бірақ Гюзельдің туралығын мойындау керек. Ол сыртыңнан ештеңе айтпайтын. Тек бетіңе айтатын бәрін. Сол тұрғыда ол ер адамдарға да үлгі деп айта аламын. Әсіресе, бетіңе күліп қарап, арқадан пышақ сұғатындарға…», - деп қорытындылады ол сөзін.
Айта кетейік, Гюзель Манюрова Қазақстанға Ресейден келген легионер. Ол 2010 жылға дейін Ресейдің атынан күресіп келді. Спорттағы мансабын аяқтағаннан кейін туған еліне қайта кетіп қалған.
