Ол бүгінде MMA спортынан Астанада жаттықтырушы болып еңбек етеді
Қазақстандық ауыратлет, әлем чемпионатының екі дүркін чемпионы Светлана Подобедованың күйеуі Нұрлан Қарабалин республикалық турнирде жүлдегер атанды.
Ол грепплингтен республикалық турнирде 92 келіге дейінгі салмақ дәрежесінде сынға түсіп, екінші орынға ие болған. Белгілі спортшы бүгінде ММА спортынан Астана қаласының аға жаттықтырушысы болып еңбек етеді.
Нұрлан мен Светлана Лондон Олимпиадасынан кейін отау құрған. Англия астанасында өткен ойындарда Подобедова чемпион атанып, арада бірнеше жыл өткенде оның допинг пайдаланғаны анықталды, тиісінше Олимпиада чемпионы деген атағы да кері қайтарылды. Ерлі-зайыптылар Руслан есімді ұлды тәрбиелеп жатыр.
Нұрлан Қарабалин Астанадағы Қажымұқан атындағы спорт-мектеп интернат колледжінің түлегі. Еркін күреспен айналысқан балуан Ақмола облысының Қорғалжын ауданының тумасы.
